விபரீதமான புத்தாண்டு: `இந்தப் பாட்ட மாத்து' சண்டையில் வாலிபர் அடித்துக்கொலை

மும்பையில் நடந்த புத்தாண்டு பார்ட்டி வன்முறையில் முடிந்தது. மும்பை மீரா ரோட்டில் உள்ள மஹாடா குடியிருப்பு வளாகத்திற்கு அருகில் உள்ள டெல்டா கார்டனில் புத்தாண்டு பார்ட்டிக்கு ஏற்பாடு செய்யப்பட்டு இருந்தது.

பார்ட்டியில் அனைவரும் பாடலுக்கு நடனமாடிக்கொண்டிருந்தனர். அதில் அதிகமானோர் மது போதையில் இருந்தனர். மராத்தி பாடலுக்கு நடனமாடிக்கொண்டிருந்தனர். கூட்டத்தில் இருந்த சிலர் போஜ்புரி பாடல் போடவேண்டும் என்று தெரிவித்தனர். இதனால் இரு தரப்பினர் இடையே தகராறு ஏற்பட்டது. ஏற்கெனவே சிலர் குடிபோதையில் இருந்ததால் அவர்கள் ஒருவருக்கொருவர் மோதிக்கொண்டனர். இதில் ராஜா, விபுல் ராய் ஆகியோர் படுகாயம் அடைந்தனர். அவர்கள் இரண்டு பேரும் மருத்துவமனையில் சேர்க்கப்பட்டனர். மருத்துவமனையில் சிகிச்சை பெற்று வந்த ராஜா நேற்று சிகிச்சை பலனலிக்காமல் இறந்துபோனார்.

அவர்கள் இரண்டு பேரையும் தாக்கிய ஆசிஷ் ஜாதவ் மற்றும் அவரின் தந்தை பிரகாஷ் ஆகியோர் கைது செய்யப்பட்டுள்ளனர். பிரகாஷ் சகோதரர் உட்பட மேலும் இரண்டு பேரைத் தேடி வருவதாக போலீஸார் தெரிவித்துள்ளனர். பார்ட்டியில் கலந்துகொண்ட பிரசாந்த் பாண்டே இதுகுறித்து அளித்த பேட்டியில், புத்தாண்டு பார்ட்டிக்கு மியூசிக் சிஸ்டம் வைக்கும்போதே ஆசிஷ் மற்றும் ராஜா இடையே தகராறு ஏற்பட்டது. நாங்கள்தான் சமாதானப்படுத்தினோம். கோபத்தில் சென்ற ஆசிஷ் அதிகாலையில் கம்பு மற்றும் இரும்புக் கம்பிகளுடன் உறவினர்களை அழைத்து வந்து ராஜாவை அடித்து உதைத்தனர்''என்றார். இது குறித்து ராஜாவின் மைத்துனர் திலிப் கூறுகையில்,'' ராஜாவை அடித்ததில் அவர் மயங்கி கீழே விழுந்தார். அப்படி இருந்தும் கூட ஆசிஷ் தொடர்ந்து கம்பால் அடித்தார். இதில் ராஜாவின் தலையில் பலத்த காயம் ஏற்பட்டது''என்று தெரிவித்தார்.

புத்தாண்டு தினத்தன்று அந்தேரியில் மற்றுமொரு சம்பவம் நடத்திருக்கிறது.

மகளுக்கு வாழ்த்து சொல்ல வந்த தந்தைக்கு சுத்தியல் அடி

மும்பை அந்தேரி ஜுகு பகுதியில் புத்தாண்டு தினத்தன்று இரவு தனது மகளுக்கு பிறந்தநாள் வாழ்த்து சொல்ல வந்த தந்தை சுத்தியலால் தாக்கப்பட்டார். ஜுகு பகுதியைச் சேர்ந்த 65 வயது நபருக்கு 4 மகள்கள் இருக்கின்றனர். அவர்கள் அனைவருக்கும் திருமணமாகிவிட்டது. இதில் ஒரு மகள் அவரது வீட்டிற்கு அருகில் தன் கணவரோடு இருந்தார். அந்த மகளுக்கு அதே பகுதியைச் சேர்ந்த ஒருவருடன் திருமணம் தாண்டிய உறவு இருந்தது. அந்த உறவைக் கைவிடும்படி 65 வயது தந்தை கேட்டுக்கொண்டார். ஆனால் மகள் கைவிடவில்லை. புத்தாண்டு அன்று அப்பெண்ணின் கணவர் தனது சொந்த ஊருக்கு சென்று இருந்தார். எனவே தன் மகளுக்கு புத்தாண்டு வாழ்த்து சொல்லவேண்டும் என்ற நோக்கில் 65 வயது தந்தை மகள் வீட்டிற்கு வந்தார். அங்கு மகளின் காதலனும் இருந்தார்.

இதனால், `இங்கு ஏன் இருக்கிறாய்?' என்று அந்த நபரிடம் 65 வயது தந்தை கேட்டார். இது தொடர்பாக இருவருக்கும் இடையே வாக்குவாதம் ஏற்பட்டது. வாக்குவாதம் முற்றிய நிலையில், `எனக்கும் என் காதலிக்கும் இடையில் வந்தால் உன்னை கொலை செய்து விடுவேன்' என்று கூறிக்கொண்டு வீட்டில் கிடந்த சுத்தியலை எடுத்து 65 வயது நபர் மீது அப்பெண்ணின் காதலன் தாக்கினார். இதில் தலை, தோள் உட்பட உடம்பின் பல இடங்களில் காயம் ஏற்பட்டு 65 வயது நபர் கீழே விழுந்தார். உறவினர்களும், பக்கத்து வீட்டுக்காரர்களும் தலையிட்டு அவர் தாக்கப்படுவதைத் தடுக்க முயன்றனர். 65 வயது நபரைத் தாக்கிவிட்டு அப்பெண்ணின் காதலன் தப்பி ஓடிவிட்டார்.

அவரை உடனே மருத்துவமனையில் சேர்த்தனர். தற்போது அவரது உயிருக்கு அச்சுறுத்தல் இல்லை என்று டாக்டர்கள் தெரிவித்துள்ளனர். போலீஸார் இது தொடர்பாக வழக்கு பதிவு செய்து தாக்குதல் நடத்திய நபரை கைது செய்துள்ளனர்.