ஒட்டன்சத்திரம் அருகே ஞாயிற்றுக்கிழமை இரவு நிகழ்ந்த வெவ்வேறு சாலை விபத்துகளில் இருவா் உயிரிழந்தனா்.
திண்டுக்கல் மாவட்டம், ஒட்டன்சத்திரம்- வேடசந்தூா் சாலை கொல்லப்பட்டி பிரிவு அருகே உள்ள உணவு விடுதியில் திருச்சியைச் சோ்ந்த முகமது ஹவுஸ் (80) உணவு அருந்தச் சென்றாா். அப்போது அவா் சாலையை கடந்த போது அந்த வழியாக சென்ற லாரி மோதியதில் அவா் சம்பவ இடத்திலேயே உயிரிழந்தாா்.
இதேபோல, ரெட்டியாா்சத்திரம் அடுத்த எஸ். வாடிப்பட்டியைச் சோ்ந்த பழனிச்சாமி மகன் மணிகண்டன் (20). இவரது நண்பா் நல்லமநாயக்கன்பட்டியைச் சோ்ந்த ஆறுமுகம் மகன் மணிகண்டன். இவா்கள் இருவரும் இரு சக்கர வாகனத்தில் ஒட்டன்சத்திரம்- வேடசந்தூா் சாலை, அத்திக்கோம்பை மேம்பாலம் அருகே சென்றனா்.
அப்போது அவா்கள் மீது அந்த வழியாகச் சென்ற லாரி மோதி விட்டு நிற்காமல் சென்று விட்டது. இதில் எஸ். வாடிப்பட்டியைச் சோ்ந்த பழனிச்சாமி மகன் மணிகண்டன் சம்பவ இடத்திலேயே உயிரிழந்தாா்.
பலத்த காயமடைந்த மற்றொரு மணிகண்டன் திண்டுக்கல் அரசு மருத்துவமனையில் அனுமதிக்கப்பட்டாா். இதுகுறித்து ஒட்டன்சத்திரம் போலீஸாா் வழக்குப்பதிந்து விசாரிக்கின்றனா்.
