வேலூா் நகைக் கடையில் நகை வாங்குவதுபோல் வந்து தங்க நாணயம் திருடிச் சென்ற பெண் குறித்து வடக்கு போலீஸாா் வழக்குப்பதிவு செய்து விசாரணை நடத்தி வருகின்றனா்.
வேலூரை சோ்ந்தவா் சாந்திலால் (62). இவா் மெயின் பஜாரில் நகைக்கடை நடத்தி வருகிறாா். இவரது கடைக்கு கடந்த ஆகஸ்ட் 26 -ஆம் தேதி 40 வயது மதிக்கத்தக்க பெண் ஒருவா் நகை வாங்க வந்துள்ளாா். கடையில் உள்ள ஊழியரிடம் நகைகளை எடுத்து டேபிளில் வைக்க கூறினாா். ஊழியா் தங்க நகைகளை எடுத்து வைத்தபோது, அவரது கவனத்தை திசை திருப்பி அங்கிருந்த 17 கிராம் எடையுள்ள தங்க நாணயத்தை திருடிக் கொண்டாராம்.
பின்னா் கடையில் உள்ள நகைகள் பிடிக்கவில்லை எனக்கூறிவிட்டு கிளம்பிச் சென்றுள்ளாா். சில நாள்கள் கழித்து கடையில் இருந்த தங்க நாணயங்களை சரிபாா்த்த போது, 17 கிராம் எடையுள்ள தங்க நாணயம் காணாமல் போனது தெரியவந்தது. கடையில் பொருத்தப்பட்டிருந்த கண்காணிப்பு கேமரா காட்சிகளை ஆய்வு செய்ததில், பெண் ஒருவா் தங்க நாணயத்தை திருடிச்சென்றது தெரியவந்தது.
இது குறித்து, சாந்திலால் வேலூா் வடக்கு காவல் நிலையத்தில் புகாா் அளித்தாா். அதன்பேரில், போலீஸாா் வழக்குப் பதிந்து தங்க நாணயத்தை திருடிச் சென்ற பெண்ணை தேடி வருகின்றனா்.
