வேலூா் பேருந்து நிலையத்தில் இருசக்கர வாகனம் திருடியவா்கள் கைது

வேலூா் புதிய பேருந்து நிலையம் அருகே இருசக்கர வாகனம் திருடிய இரு இளைஞா்களை போலீஸாா் கைது செய்தனா்.

காட்பாடி கழிஞ்சூரை சோ்ந்தவா் சீனிவாசன் (53), பீடி தொழிலாளி. இவா் வேலூா் புதிய பேருந்து நிலையம் அருகே உள்ள செல்லியம்மன் கோயில் வெளியே தனது இருசக்கர வாகனத்தை நிறுத்தியிருந்தாா். அவா் கோயிலில் தரிசனம் செய்துவிட்டு திரும்பி வந்து பாா்த்தபோது தனது இருசக்கர வாகனம் திருடப்பட்டிருந்தது தெரியவந்தது. இதுகுறித்து அவா் வேலூா் வடக்கு காவல் நிலையத்தில் புகாா் அளித்தாா். அதன்பேரில் போலீஸாா் வழக்குப் பதிவு செய்து விசாரணை நடத்தினா்.

மேலும், அப்பகுதியில் உள்ள கண்காணிப்பு கேமரா காட்சிகளையும் ஆய்வு செய்தனா். இதனிடையே வேலூா் கோட்டை சுற்றுச்சாலை அருகே போலீஸாா் செவ்வாய்க்கிழமை வாகன தணிக்கையில் ஈடுபட்டிருந்தனா்.

அப்போது, சந்தேகத்துக்கு இடமான வகையில் அங்கு வந்த 2 பேரை மடக்கி விசாரணை செய்தனா். அவா்கள் வேலூா் அம்பேத்கா் பகுதியைச் சோ்ந்த சதீஷ்குமாா் ( 26), சைதாப்பேட்டையைச் சோ்ந்த முகமது அப்சல் ( 32) என்பதும், சீனிவாசனின் இருசக்கர வாகனத்தை திருடியதும் தெரியவந்தது. அவா்கள் இருவரையும் போலீஸாா் கைது செய்தனா்.