வெளிநாட்டில் வேலை வாங்கி தருவதாகக் கூறி மோசடியில் ஈடுபட்டவா் குண்டா் சட்டத்தில் புதன்கிழமை கைது செய்யப்பட்டாா்.
காஞ்சிபுரம் மாவட்டம், பொழிச்சலூரை சோ்ந்தவா் கிருபாகரன் (37). இவரது மனைவி செந்துாரதேவி, அவரது தாய் தனக்கொடி ஆகிய மூவரும் சோ்ந்து, வேலை வாங்கித் தருவதாகக் கூறி, நாகை மாவட்டம், கல்லறைத் தோட்டத்தைச் சோ்ந்த பானுமதி, ராஜா, பாண்டிம்மாள் ஆகியோரிடம் தலா ரூ. 4 லட்சம், அஜித்குமாா், இன்பராஜா ஆகியோரிடம் தலா ரூ. 5 லட்சம், தமிழ்மணியிடம் ரூ. 10 லட்சம், இளையராஜாவிடம் ரூ. 6 லட்சம், தா்மராஜிடம் ரூ. 3.30 லட்சம், மனோகரனிடம் ரூ. 6.30 லட்சம், அரியலூரைச் சோ்ந்த உதயசந்திரன், தம்பிக்கோட்டை லதா, வைஜெயந்திமாலா, மற்றும் ரெத்தினசபாபதி ஆகியோரிடம் ரூ. 9 லட்சம் என மொத்தம் ரூ. 56.60 லட்சத்தை பெற்றுக்கொண்டு போலந்து நாட்டில் வேலை வாங்கி தருவதாக கூறி, ஆா்மேனியா நாட்டுக்கு அழைத்துச்சென்று அங்கு பல மாதங்கள் உணவு இருப்பிட வசதி இல்லாமல் தங்கவைத்து ஏமாற்றி மோசடி செய்ததாகக் கூறப்படுகிறது.
இதுகுறித்து மாவட்ட காவல் கண்காணிப்பாளரிடம் புகாா் கொடுத்து மாவட்டக் குற்றப்பிரிவில் வழக்குப் பதிவு செய்யப்பட்டுள்ளது. மேலும், குற்றம்சாட்டப்பட்டுள்ள 3 பேரும் வெளிநாட்டில் வேலை வாங்கித் தருவதாகக் கூறி மோசடி செய்ததாக மதுரை, சென்னை மாம்பலம், நெய்வேலி காவல் நிலையங்களில் பதியப்பட்ட வழக்குகள் விசாரணையில் உள்ளன.
இந்நிலையில், கிருபாகரன் அண்மையில் நாகை மாவட்ட குற்றப்பிரிவு போலீஸாரால் கைது செய்யப்பட்டாா். தற்போது நாகை மாவட்ட காவல் கண்காணிப்பாளா் சு. செல்வக்குமாா் பரிந்துரையின் பேரில், மாவட்ட ஆட்சியா் ப. ஆகாஷ் உத்தரவின்பேரில் கிருபாகரன் குண்டா் தடுப்புச் சட்டத்தில் புதன்கிழமை கைது செய்யப்பட்டாா்.
