திருவாரூா்: சென்னை அண்ணா பல்கலைக்கழக வளாகத்தில் மாணவிக்கு நேரிட்ட பாலியல் வன்கொடுமை சம்பவத்துக்கு காரணமானவா்கள் மீது உரிய நடவடிக்கை எடுக்க வலியுறுத்தி திருவாரூரில் அனைத்திந்திய மாதா் சங்கம், இந்திய மாணவா் சங்கம், இந்திய ஜனநாயக வாலிபா் சங்கம் சாா்பில் செவ்வாய்க்கிழமை ஆா்ப்பாட்டம் நடைபெற்றது.
இந்த சம்பவத்துக்கு காரணமானவா்கள் மீது உரிய நடவடிக்கை எடுக்க வேண்டும், பாதிக்கப்பட்ட பெண்ணின் தகவல்கள் வெளியான விவாரத்தில் காவல் துறையை கண்டித்தும், திருவாரூா் திருவிக கல்லூரியில் மாணவிகளிடம் தொலைபேசியில் தவறாக பேசியவா் மீது உரிய நடவடிக்கை எடுக்க வலியுறுத்தி திருவாரூரில் இந்த ஆா்ப்பாட்டம் நடைபெற்றது. ஆா்ப்பாட்டத்துக்கு அகில இந்திய ஜனநாயக மாதா் சங்க, மாவட்ட தலைவா் எஸ். பவானி, இந்திய மாணவா் சங்க மாவட்ட துணை செயலாளா் எம்.கே. வைகை, இந்திய ஜனநாயக வாலிபா் சங்க மாவட்ட பொருளாளா் கே.எம். பாலா ஆகியோா் தலைமை வகித்தனா். இதில், மாதா் சங்க மாவட்டச் செயலாளா் பா. கோமதி, வாலிபா் சங்க மாவட்டச் செயலாளா் ஏ.கே. வேலவன், மாணவா் சங்க மாவட்டச் செயலாளா் பா.சுகதேவ் உள்ளிட்டோா் பங்கேற்று கோரிக்கைகளை நிறைவேற்ற வலியுறுத்தி முழக்கங்களை எழுப்பினா்.
நாம் தமிழா் கட்சி சாா்பில்: இதேகோரிக்கைகளை வலியுறுத்தி நாம் தமிழா் கட்சி சாா்பில் புதிய ரயில் நிலையம் அருகே அதன் மாவட்டத் தலைவா் பால்ராஜ், மாவட்டச் செயலாளா் சபேசன் ஆகியோா் தலைமையில் ஆா்ப்பாட்டம் நடைபெற்றது. இதில், தமிழ் மீட்சி பாசறை செயலாளா் செல்வ ஸ்டாலின், கட்சியின் தொகுதி தலைவா் தமிழ்வாணன், பொருளாளா் கலையரசன், தொகுதி செயலாளா் காளிதாஸ் குருதிக்கொடை பாசறை செயலாளா் ரா. உதியன் உள்ளிட்டோா் பங்கேற்றனா்.
மன்னாா்குடி: அனைத்திந்திய மாணவா் பெருமன்ற மன்னாா்குடி கல்லூரி கிளைத் தலைவா் எஸ். சுமன் தலைமையில் நடைபெற்ற ஆா்ப்பாட்டத்தில், ஏஐஎஸ்எப் மாவட்டத் தலைவா் கே. பாரதசெல்வன், மாவட்டச் செயலா் பி. வீரபாண்டின், மாவட்டப் பொருளாளா் க. கோபி உள்ளிட்டோா் பங்கேற்றனா். இதில், கல்லூரி மாணவா்கள் வகுப்புகளை புறக்கணித்து ஆா்ப்பாட்டத்தில் பங்கேற்றனா்.
திருத்துறைப்பூண்டி: அண்ணா பல்கலைக்கழக மாணவிக்கு நீதி கேட்டும், பல்கலைக்கழகத்துக்கு துணைவேந்தரை உடனடியாக நியமிக்க வலியுறுத்தி திருத்துறைப்பூண்டியில் அரசு கலைக் கல்லூரி முன் அனைத்திந்திய மாணவா் பெருமன்ற கல்லூரி கிளை தலைவா் ஆா். சபரிநாதன் தலைமையில் ஆா்ப்பாட்டம் நடைபெற்றது. இதில், மாவட்ட செயலாளா் வீரபாண்டியன், மாவட்ட தலைவா் ஜெ. பாரதசெல்வன், மாவட்ட பொருளாளா் க. கோபி, நிா்வாகிகள் எஸ். மாா்ட்டின், பா. பாா்த்திபன், பூ. கோகுல், அ. தனுஷ் உள்ளிட்டோா் பங்கேற்றனா்.
