அமலாக்க துறை சோதனைக்கு காரணம் துணை நிலை ஆளுநா்: சவுரப் பரத்வாஜ் குற்றச்சாட்டு

தில்லி ஆம் ஆத்மி கட்சியின் தலைவா் சவுரப் பரத்வாஜ் அமலாக்க துறையை புதன்கிழமை அவதூறாக பேசினாா். அமலாக்க துறையினா் செவ்வாய்க்கிழமை பணமோசடி விசாரணையின் ஒரு பகுதியாக சவுரப் பரத்வாஜ் தொடா்புடைய இடங்களில் சோதனை நடத்தியது. இதனையடுத்து புதன்கிழமை பேசிய அவா் துணை நிலை ஆளுநா் கவி. கே. சக்சேனா தன்னை ஒரு தவறான வழக்கில் சிக்க வைக்க சதி செய்லதாக குற்றம் சாட்டினாா்.

தில்லியில் ஆம் ஆத்மி ஆட்சியின் போது சுகாதார உள்கட்டமைப்பு திட்டங்களில் நடந்ததாகக் கூறப்படும் ஊழலுடன் தொடா்புடைய பணமோசடி விசாரணையின் ஒரு பகுதியாக முன்னாள் அமைச்சா் சவுரப் பரத்வாஜ் மற்றும் சில தனியாா் ஒப்பந்தக்காரா்களின் வளாகத்தில் அமலாக்கத் துறை செவ்வாய்க்கிழமை சோதனைகளை நடத்தியது. பணமோசடி தடுப்புச் சட்டத்தின் (பி. எம். எல். ஏ) கீழ் தேசிய தலைநகா் பிராந்தியத்தில் (என். சி. ஆா்) குறைந்தது 13 இடங்களில் சோதனை நடத்தப்பட்டது.

புதன்கிழமை செய்தியாளா் கூட்டத்தில் உரையாற்றிய பரத்வாஜ், காலை 7.15 மணியளவில் அவரது இல்லத்திற்கு அமலாக்கத்துறை குழு வந்ததாக கூறினாா். ‘முதலில், அவா்கள் என் வீட்டில் சோதனை நடத்தினா், பின்னா் எனது அறிக்கையை பதிவு செய்ய என்னை உட்கார வைத்தனா். அவா்கள் என்னிடம் 43 கேள்விகளைக் கேட்டனா், அவை அனைத்திற்கும் நான் பதிலளித்தேன். எனது அறிக்கையை பதிவு செய்த பிறகு, அவா்கள் அதை எங்கோ அனுப்பினா். அவா்கள் அதை எங்கு அனுப்பினாா்கள் என்று எனக்குத் தெரியவில்லை, ஆனால் பின்னா் அவா்கள் என்னிடம் வந்து எனது அறிக்கையின் ஒரு பகுதியை நீக்குமாறு கேட்டுக்கொண்டனா் ‘என்று குற்றம் சாட்டினாா்.

பரத்வாஜ் தனது அறிக்கையை மாற்ற மறுத்ததால் அவா் கைது செய்யப்படுவாா் என்ற எண்ணம் அவரது குடும்பத்தினருக்கு வழங்கப்பட்டதாக கூறினாா். ‘இப்படித்தான் அமாலக்கத் துறை செயல்படுகிறது. அவா்கள் உங்களை உளவியல் ரீதியாக கையாளுகிறாா்கள், வற்புறுத்தல் மற்றும் அச்சுறுத்தலைப் பயன்படுத்துகிறாா்கள். எனது அறிக்கையில் நான் என்ன சொல்கிறேன் என்பதை அமலாக்கத்துறை எவ்வாறு ஆணையிட முடியும்? என்றாா்.

‘அதிகாரிகள் உத்தரவுகளை அமல்படுத்தவில்லை என்பதை துணை நிலை ஆளுநா் உறுதிப்படுத்தினாா். என்னை சிக்கவைக்க அதிகாரிகளுடன் சோ்ந்து சதித்திட்டம் தீட்டினாா் ‘என்று அவா் கூறினாா். தான் கைது செய்யப்பட்டு சிறைக்கு அனுப்பப்படுவேன் என்று தனக்குத் தெரியும் என்று பரத்வாஜ் கூறினாா். ‘நான் சிறையில் இருக்கும்போது, எனது வழக்குரைஞா்கள் உண்மையை அம்பலப்படுத்துவாா்கள்‘ என்று அவா் மேலும் கூறினாா்.