அரசமைப்புச் சட்டத்தின் மீது கைவைத்தால் தீவிரமாக போராடுவோம்: மல்லிகாா்ஜுன காா்கே

பெங்களூரு: அரசமைப்புச் சட்டத்தின் எந்தவொரு வாா்த்தையின் மீதாவது கைவைத்தால், தீவிரமாக போராட்டம் நடத்துவோம் என்று அகில இந்திய காங்கிரஸ் தலைவா் மல்லிகாா்ஜுன காா்கே தெரிவித்தாா்.

அவசரநிலை பிரகடனம் செய்யப்பட்ட 50ஆவது ஆண்டு விழாவில் பேசிய ஆா்.எஸ்.எஸ். அமைப்பின் பொதுச் செயலாளா் தத்தாத்ரேய ஹொசபெலே, அரசமைப்புச் சட்டத்தின் முகப்புரையில் இருக்கும் ‘சோசலிசம்’ மற்றும் ‘மதச்சாா்பின்மை’ ஆகிய வாா்த்தைகளை நீக்க வேண்டும் என்று வலியுறுத்தினாா்.

இதுகுறித்து பெங்களூரில் திங்கள்கிழமை செய்தியாளா்களிடம் காங்கிரஸ் தலைவா் மல்லிகாா்ஜுன காா்கே கூறியதாவது: ஆா்.எஸ்.எஸ். அமைப்பின் பொதுச் செயலாளா் தத்தாத்ரேய ஹொசபெலே, மனுஸ்மிருதியை விரும்பும் மனிதா். ஏழை மக்கள் முன்னேற்றம் அடையக்கூடாது என்பது அவரின் எண்ணம். ஆயிரம் ஆண்டுகளுக்கு முன்பு என்ன கடைப்பிடிக்கப்பட்டதோ, அவற்றை மீண்டும் கடைப்பிடிக்க வேண்டுமென்பதே அவரது விருப்பம். அதனால்தான் அவருக்கு சோசலிசம், மதச்சாா்பின்மை, விடுதலை, சமத்துவம், சகோதரத்துவம் போன்றவை பிடிக்கவில்லை. இது அவரது கருத்து மட்டுமல்ல, ஆா்.எஸ்.எஸ். அமைப்பின் கருத்தும் அதுதான்.

ஆா்.எஸ்.எஸ். அமைப்பு, எப்போதும் ஏழைகள், ஒடுக்கப்பட்ட மக்கள், தாழ்த்தப்பட்டோா், இதர சமுதாயங்களுக்கு எதிரானதாகும். அவா்களுக்கு ஆா்வம் இருந்திருந்தால், தீண்டாமையை நீக்கியிருக்கலாமே. ஹிந்து மதத்தின் பாதுகாப்பாளா்கள் என்று தங்களை கூறிக்கொள்ளும் ஆா்.எஸ்.எஸ். அமைப்பு தீண்டாமையை நீக்க வேண்டும். தீண்டாமையை முழுமையாக நீக்குவதற்காக பணியாற்றும்படி தனது ஊழியா்களை ஆா்.எஸ்.எஸ். முழுமையாக ஈடுபடுத்த வேண்டும். அதன்மூலம் நாட்டு மக்களை ஒற்றுமையாக வைத்திருக்க வேண்டும். இதை செய்வதற்கு பதிலாக, வெறுமனே பேசுவதும், தேவையற்ற சப்தங்களை எழுப்புவதும், நாட்டில் குழப்பத்தை ஏற்படுத்துவதும் மிகவும் மோசமானது. அதனால் தான் ஆா்.எஸ்.எஸ்.க்கு எதிராக இருக்கிறோம்.

அரசமைப்புச் சட்டத்தின் எந்தவொரு வாா்த்தையின் மீதாவது கைவைத்தால், அதை எதிா்த்து கடுமையான போராட்டம் நடத்துவோம் என்றாா்.