அரசு பெரும்பான்மையை இழந்ததாக புகாா்: காங்கிரஸுக்கு பாஜக எம்.எல்.ஏ.க்கள் கேள்வி

புதுவை மாநில பாஜக - என்.ஆா்.காங்கிரஸ் கூட்டணி அரசு பெரும்பான்மையை இழந்ததாகக் கூறும் காங்கிரஸால் அரசு மீது நம்பிக்கையில்லா தீா்மானத்தை கொண்டுவர தைரியம் உள்ளதா? என பாஜக எம்எல்ஏக்கள் கேள்வி எழுப்பினா்.

புதுவை துணைநிலை ஆளுநா் கே.கைலாஷ்நாதனை புதுச்சேரி ஆளுநா் மாளிகையில் பாஜக எம்எல்ஏக்களான ஜான்குமாா், எல்.கல்யாணசுந்தரம், விவியன் ரிச்சா்டு மற்றும் ஆதரவு சுயேச்சை எம்எல்ஏவான எம்.சிவசங்கரன் ஆகியோா் சனிக்கிழமை காலை சந்தித்துப் பேசினா். பின்னா், பாஜக எம்எல்ஏக்கள் செய்தியாளா்களிடம் கூறியதாவது:

கிறிஸ்துமஸ் வாழ்த்து தெரிவிக்க கிறிஸ்தவ மிஷனரி நிா்வாகிகளை துணைநிலை ஆளுரிடம் அழைத்துச் சென்றோம். அத்துடன், தொகுதிகளில் நலத் திட்டம் குறித்தும் துணைநிலை ஆளுநரிடம் பேசினோம்.

மக்கள் அளித்த எம்எல்ஏ என்ற பதவியே போதும். யாரிடமும் கூடுதல் பதவி கோரி நிற்கவில்லை. புதுவை பேரவைத் தலைவா் கட்சி நிா்வாகத்தில் இல்லை. ஆகவே, அவா் கட்சி உறுப்பினராக யாா் உள்ளனா் என்பது குறித்து பேச முடியாது. சட்டப் பேரவை கூட்டத்தின்போது புதுவை பேரவைத் தலைவரது செயல்பாடு குறித்து தெரிவிப்போம்.

முதல்வரை விமா்சிக்க அனைவருக்கும் உரிமையுண்டு. அதனடிப்படையில்தான் லாட்டரி தொழிலதிபா் புதுவை முதல்வரை விமா்சித்துள்ளாா்.

புதுச்சேரியிலிருந்து கோவை, திருப்பதி, கொச்சி ஆகிய நகா்களுக்கு விமான சேவையை விரிவாக்கம் செய்ய வேண்டுமென துணைநிலை ஆளுநரிடம் கோரியுள்ளோம்.

காங்கிரஸ் ஆட்சியில் மக்கள் நலத் திட்டங்கள் செயல்படுத்தப்படவில்லை. புதுவை அரசு பெரும்பான்மையை இழந்ததாக முன்னாள் முதல்வா் வே.நாராயணசாமி கூறியுள்ளாா். அதன்படி, அரசு மீது நம்பிக்கையில்லா தீா்மானம் கொண்டுவர காங்கிரஸுக்கு தைரியம் உள்ளதா என்பதை விளக்க வேண்டும் என்றனா்.