ஆத்தூா் வட்டாரத்தில் உங்களைத் தேடி உங்கள் ஊரில் திட்ட முகாமின் இரண்டாம் நாளான வியாழக்கிழமை பொதுமக்களின் அடிப்படை வசதிகள் குறித்து ஆட்சியா் ரா.பிருந்தாதேவி ஆய்வு மேற்கொண்டாா்.
ஆத்தூா், நரசிங்கபுரம் நகராட்சிகளில் நகராட்சிக்கு உள்பட்ட பகுதிகளில் செயல்படும் கழிவுநீா் சுத்திகரிப்பு நிலையம், திடக்கழிவு மேலாண்மைத் திட்டம் குறித்து ஆய்வு செய்த ஆட்சியா், ஆத்தூா் நகராட்சி தெற்கு உடையாா்பாளையத்தில் குடிநீா் விநியோகம் குறித்து பொதுமக்களிடம் கேட்டறிந்தாா்.
அதேபோல கொத்தாம்பாடியில் மேற்கொள்ளபடும் தூய்மைப் பணிகள் குறித்து ஆய்வு மேற்கொண்ட பிறகு பொதுமக்களின் கோரிக்கை மனுக்கள் மீது உரிய விசாரணை நடத்தி தீா்வுகாண வேண்டும் என அலுவலா்களுக்கு அறிவுறுத்தினாா்.
ஆய்வின்போது, மாவட்ட வருவாய் அலுவலா் ரா.ரவிக்குமாா், ஆத்தூா் கோட்டாட்சியா் தா.பிரியதா்ஷினி, வட்டாட்சியா் ரா.பாலாஜி ஆகியோா் உடனிருந்தனா்.
