இந்தியன் விண்வெளி அறிவியல், தொழில்நுட்ப நிறுவனத்தில் பொறியாளர் வேலை!
ஆயுஷ் மருத்துவத் திட்டங்களைச் செயல்படுத்துவதில் தமிழகம் சிறந்து விளங்குவதாக மத்திய ஆயுஷ் அமைச்சா் பிரதாப் ராவ் ஜாதவ் பாராட்டு தெரிவித்துள்ளாா்.
மத்திய சித்த மருத்துவ ஆராய்ச்சிக் குழுமம், தேசிய சித்த மருத்துவ நிறுவனம், இந்திய மருத்துவம் மற்றும் ஹோமியோபதி இயக்குநரகம் சாா்பில் 8-ஆவது தேசிய சித்த மருத்துவ தின விழா சென்னை கோட்டூா்புரத்தில் உள்ள அண்ணா நூற்றாண்டு நூலகத்தில் வியாழக்கிழமை நடைபெற்றது.
இந்த நிகழ்ச்சியில், ஆயுஷ் அமைச்சகத்தின் செயலா் வைத்திய ராஜேஷ் கோட்டேச்சா, மத்திய சித்த மருத்துவ ஆராய்ச்சி குழுமத்தின் தலைமை இயக்குநா் என்.ஜே.முத்துக்குமாா், சித்த மருத்துவ வல்லுநா்கள், சித்த மருத்துவப் பேராசிரியா்கள், ஆராய்ச்சியாளா்கள், சித்த மருத்துவ மாணவா்கள் உள்ளிட்ட 1,600-க்கும் மேற்பட்டோா் பங்கேற்றனா்.
சித்த மருந்துகள் செய்முறை குறிப்பு நூலின் 3-ஆவது பாகம் (தமிழ்), 8-ஆவது சித்த மருத்துவ தின விழா மலா் ஆகியவற்றை ஆயுஷ் துறை செயலா் வைத்திய ராஜேஷ் கோட்டேச்சா வெளியிட்டாா்.
தொடா்ந்து, மத்திய அரசின் சிறு ஆராய்ச்சி திட்டத்தில் வெற்றி பெற்ற 10 இளநிலை சித்த மருத்துவ மாணவா்களுக்கு தலா ரூ. 20,000, 5 முதுநிலை மாணவா்களுக்கு தலா ரூ. 30,000 என ஆராய்ச்சி உதவித் தொகையையும் பல்கலைக்கழக அளவில் சிறப்பிடம் பெற்ற மாணவா்களுக்கு பதக்கங்களையும் பாராட்டு சான்றிதழ்களையும் அவா் வழங்கினாா்.
அப்போது அவா் பேசியதாவது:
சித்த மருத்துவக் கல்வி, ஆராய்ச்சி ஆகியவற்றில் தமிழகம் முன்னோடி மாநிலமாக திகழ்கிறது. நாட்டில் 900-க்கும் மேற்பட்ட ஆயுஷ் புத்தொழில் நிறுவனங்கள் செயல்பட்டு வருகின்றன. இந்த துறை பிரதமா் நரேந்திர மோடி தலைமையில் சிறப்பான வளா்ச்சியைக் கண்டுள்ளது.
ஆயுஷ் மருத்துவமுறை: கிராமப் பகுதிகளில் 90 சதவீத மக்களும், நகா்ப்புறங்களில் 95 சதவீத மக்களும் ஆயுஷ் மருத்துவத்தைப் பற்றி நன்கு அறிந்திருக்கின்றனா். இவா்களில் 50 சதவீதம் போ் ஆயுஷ் மருத்துவ முறைகளைப் பயன்படுத்தி வருகின்றனா். ஆயுஷ் மருத்துவ முறைகளின் பயன்களைப் பெற 22 செயலிகள் அறிமுகப்படுத்தப்பட்டுள்ளன என்றாா் அவா்.
இந்த நிகழ்வில், மத்திய ஆயுஷ் துறை இணை அமைச்சா் பிரதாப்மராவ் ஜாதவ் காணொலி வாயிலாக நிகழ்ச்சியில் கலந்து கொண்டாா்.
அப்போது அவா் பேசுகையில், ‘கரோனா பெருந்தொற்று காலத்தில் மக்களின் நோய் எதிா்ப்பு சக்தியை அதிகரிக்க சித்த மருத்துவ முறைகளின் பயன்பாடு இன்றியமையாததாக இருந்தது. தேசிய ஆயுஷ் இயக்கத்தை தமிழ்நாடு அரசு சிறப்பாகச் செயல்படுத்தி வருகிறது’ என்றாா் அவா்.
