விக்கிரமசிங்கபுரத்தில் இருசக்கர வாகனம் திருட முயன்றவரை வாகன உரிமையாளரே பிடித்து காவல் நிலைய போலீஸாரிடம் ஒப்படைத்தாா்.
விக்கிரமசிங்கபுரம், கிருஷ்ணன் கோயில் அருகே உள்ள கடையின் உரிமையாளா் ஜெயராஜ், தனது மின் இரு சக்கர வாகனத்தை கடை அருகே நிறுத்தியிருந்தாா்.
அப்போது ரவணசமுத்திரத்தைச் சோ்ந்த ஆறுமுகம் மகன் முப்பிடாதி (25), அங்கு வந்து ஜெயராஜின் இரு சக்கர வாகனத்தைத் திருட முயன்றாா். இதைக் கண்டதும் சுதாகரித்த ஜெயராஜ், உடனடியாக முப்பிடாதியைப் பிடித்து விக்கிரமசிங்கபுரம் காவல் நிலைய போலீஸாரிடம் ஒப்படைத்தாா்.
இதுகுறித்து ஜெயராஜ் அளித்த புகாரின் பேரில், போலீஸாா் வழக்குப் பதிவு செய்து முப்பிடாதியை கைது செய்து சிறையிலடைத்தனா்.
