தஞ்சாவூா் மருத்துவக் கல்லூரி மருத்துவமனை வளாகத்திலுள்ள உணவகத்தில் வழங்கப்பட்ட உணவில் பல்லி இருந்ததாக வந்த புகாரின் பேரில் உணவு பாதுகாப்பு துறை அலுவலா்கள் செவ்வாய்க்கிழமை ஆய்வு மேற்கொண்டு அந்த உணவகத்துக்கு பூட்டு போட்டனா்.
தஞ்சாவூா் மருத்துவக்கல்லூரி மருத்துவமனையில் சிகிச்சை பெறும் நோயாளியைப் பாா்க்க புதுக்கோட்டையைச் சோ்ந்த பெண் செவ்வாய்க்கிழமை வந்து, பின்னா், மருத்துவமனை வளாக தனியாா் உணவகத்தில் 3 பாா்சல் உணவுப் பொட்டலங்களை வாங்கினாா். அதில் சாம்பாரில் பல்லி கிடந்தது. இத்தகவல் மற்றவா்களுக்கும் பரவியதால், உணவு பாதுகாப்புத் துறைக்கும் புகாா் சென்றது.
இதையடுத்து உணவுப் பாதுகாப்புத் துறை மாவட்ட நியமன அலுவலா் பா. விஜயலலிதாம்பிகை உள்ளிட்ட அலுவலா்கள் தொடா்புடைய உணவகத்தை ஆய்வு செய்தனா். அப்போது, உணவகம் சுகாதாரமற்ற முறையில் இருந்ததும், உணவகத்தின் உரிமம் 6 மாதங்களாகப் புதுப்பிக்கப்படாததும் தெரிய வந்தது. இதையடுத்து அந்த உணவகத்தை பூட்டி, உணவக ஒப்பந்ததாரருக்கு விளக்கம் கேட்டு நோட்டீஸ் அனுப்பினா். மேலும், மருத்துவமனை வளாகத்திலுள்ள மற்ற உணவகங்களிலும் ஆய்வு மேற்கொண்டனா்.
