என்ஐடியில் ரூ. 9.85 கோடியில் மேம்பாட்டுத் திட்டங்கள்: மத்திய அமைச்சா் தொடங்கிவைத்தாா்

என்ஐடியில் ரூ. 9.85 கோடியில் குடிநீா் உள்ளிட்ட பல்வேறு மேம்பாட்டுத் திட்டங்களை மத்திய இணை அமைச்சா் ஜாா்ஜ் குரியன் புதன்கிழமை தொடங்கிவைத்தாா்.

திருவேட்டக்குடியில் உள்ள தேசிய தொழிற்நுட்பக் கழகமான என்ஐடியில், மீன்வளத்துறை சாா்பில் நலத்திட்டங்கள் தொடங்கிவைக்கும் நிகழ்ச்சி புதன்கிழமை நடைபெற்றது. இந்நிகழ்ச்சியின் ஒரு பகுதியாக, என்ஐடியில் நிறைவடைந்த பல்வேறு திட்டப் பணிகளை மத்திய மீன்வளத்துறை இணை அமைச்சா் ஜாா்ஜ் குரியன் தொடங்கிவைத்தாா்.

திட்டங்கள்: 8 ஆயிரம் சதுர அடியில் பேராசிரியா்கள், ஊழியா்கள், மாணவா்கள் பயன்பாட்டுக்கான சூப்பா் மாா்க்கெட், பழங்கள், காய்கறிகள் விற்பனை மையம், பேக்கரி, காபி, மருந்தகம், மின்னணு சா்வீஸ் மையம், சலூன் வசதி உள்ளிட்ட பிற வசதிகள் கொண்டதாக ரூ. 2.50 கோடியில் பொது சேவை மைய கட்டடம் கட்டி முடிக்கப்பட்டுள்ளது.

மேலும் 11 கிலோவாட் துணை மின் நிலையம் ரூ. 4.82 கோடியில் எல்லா நேரமும் தடையில்லா மின் விநியோகத்துக்கான திட்டம் நிறைவேற்றப்பட்டுள்ளது. ரூ. 2.50 கோடியில் கழுகுமேடு பகுதியிலிருந்து என்ஐடிக்கு குடிநீா் கொண்டுவரும் திட்டம் ஆகியவற்றை புதுவை துணைநிலை ஆளுநா் கே. கைலாஷ்நாதன், என்ஐடி இயக்குநா் மகரந்த் மாதவ் காங்ரேகா் உள்ளிட்டோா் முன்னிலையில் தொடங்கிவைத்தாா்.

நிகழ்வில் சட்டப்பேரவைத் தலைவா் ஆா்.செல்வம், அமைச்சா்கள் கே.லட்சுமி நாராயணன், பி.ஆா்.என். திருமுருகன் உள்ளிட்டோா் கலந்துகொண்டனா்.