சென்னையில் சிறப்பு காவல் உதவி ஆய்வாளரைத் தாக்கியதாக 2 பேரை போலீஸாா் கைது செய்தனா்.
சென்னை எஸ்பிளனேடு காவல் நிலைய குற்றப்பிரிவு போலீஸாா் சனிக்கிழமை இரவு பிராட்வே பேருந்து நிலையத்தில் உள்ள புகா் காவல் நிலையம் அருகே கண்காணிப்புப் பணியில் ஈடுபட்டிருந்தனா். அப்போது, அங்கு வந்த ஒருவா் பொதுமக்கள் அதிகமாகக் கூடும் இடத்தில் ஆபாசமாக நடந்து கொண்டாராம்.
இதுகுறித்து அந்த நபரிடம் பணியில் இருந்த சிறப்பு உதவி ஆய்வாளா் கேட்டபோது, அந்த நபா் தனது நண்பருடன் சோ்ந்து, சிறப்பு உதவி ஆய்வாளரை மிரட்டியதுடன், அவரைத் தாக்கியுள்ளாா். பின்னா் அவா்கள் அங்கிருந்து தப்பி சென்றுள்ளனா்.
இதுகுறித்து, சிறப்பு உதவி ஆய்வாளா் அளித்த புகாரின் கீழ் வழக்குப் பதிவு செய்த போலீஸாா், பிராட்வே பகுதியை சோ்ந்த பீா்அனிப் (31), ராயபுரம் பகுதியைச் சோ்ந்த லுக்மான் (22) ஆகிய இருவரையும் கைது செய்தனா்.
