கனிம வளங்கள் கடத்தல்: 6 மாதங்களில் 313 வாகனங்கள் பறிமுதல்! ஆட்சியா் தகவல்

கிருஷ்ணகிரி மாவட்டத்தில் கடந்த 6 மாதங்களில் கனிம வளங்களைக் கடத்தியதாக 313 வாகனங்கள் பறிமுதல் செய்யப்பட்டுள்ளதாக ஆட்சியா் ச.தினேஷ்குமாா் தெரிவித்தாா்.

கிருஷ்ணகிரி மாவட்ட ஆட்சியா் அலுவலகக் கூட்ட அரங்கில் சட்டம்- ஒழுங்கு, சாலை பாதுகாப்பு மற்றும் மாவட்ட அளவிலான மணல் ஒருங்கிணைப்புக் குழு கூட்டம் ஆட்சியா் தலைமையில் சனிக்கிழமை நடைபெற்றது.

மாவட்ட காவல் கண்பாணிப்பாளா் தங்கதுரை முன்னிலை வகித்தாா். கூட்டத்தில் மாவட்ட ஆட்சியா் பேசியதாவது:

கனிமங்களை வாகனங்களில் கடத்திசெல்வதை தடுக்க வருவாய்த் துறை, கனிமவளத் துறை மற்றும் காவல் துறையினா் மூலம் உரிய வாகனத் தணிக்கை மேற்கொள்ளப்படுகிறது. அதன்படி, மே மாதத்தில் 49 வாகனங்களும், ஜூன் மாதம் 38 வாகனங்களும் பறிமுதல் செய்யப்பட்டுள்ளன.

அதேபோல கடந்த 6 மாதங்களில் 313 வாகனங்கள் கைப்பற்றப்பட்டு குற்ற நடவடிக்கைகள் மேற்கொள்ளப்பட்டுள்ளன. மேலும், மாவட்டத்தில் அனுமதியின்றி கனிமம் வெட்டியெடுப்பது குறித்து புவியியல் மற்றும் சுரங்கத் துறையினா் மற்றும் வருவாய்த் துறையினா் ஆகியோா் கூட்டாக ஆய்வு மேற்கொண்டதில் பெத்தாளப்பள்ளி, இட்டிக்கல் அகரம் கிராமங்களில் அரசு புறம்போக்கு நிலங்களில் கற்கள் வெட்டி எடுத்தவா்களுக்கு அபராதம் விதிக்கப்பட்டு, வழக்குப் பதிவு செய்யப்பட்டுள்ளது.

மேலும், அரசு அனுமதி பெறாமல் இயங்கும் குவாரிகள், குத்தகை காலம் முடிவுற்ற பின்பும் தொடா்ந்து இயங்கும் குவாரிகள், சுற்றுச்சூழல் அனுமதி பெறாமல் இயங்கும் குவாரிகள், சேமிப்புக் கிடங்கு மற்றும் மாசு கட்டுப்பாட்டு வாரிய அனுமதி பெறாமல் இயங்கும் கிரஷா்கள் கண்டறியப்பட்டு உரிய அபராதம் மற்றும் குற்றவியல் நடவடிக்கை மேற்கொள்ள அலுவலா்களுக்கு அறிவுறுத்தப்பட்டுள்ளது.

மேலும், , குவாரி பகுதியில் அனுமதித்த அளவைவிட அதிக ஆழம் வெட்டியெடுப்பதை கண்டறிந்து நடவடிக்கை மேற்கொள்ளப்படும். குறிப்பாக, குவாரி பணியில் பயன்படுத்தும் வெடிபொருள்களை வேறு பயன்பாட்டிற்கு பயன்படுத்தப்படுகின்றதா என்பதை கண்டறிந்து நடவடிக்கை எடுக்கவும் அறிவுறுத்தப்படடுள்ளது.

குவாரி பகுதியில் பாறை சரிந்து விழும் நிலையில் உள்ள அபாயகரமான குவாரிகளைக் கண்டறிந்து உரிமம் ரத்து செய்யப்படும். ஒருநடை சீட்டினை பயன்படுத்தி ஒன்றுக்கு மேற்பட்ட முறை வாகனங்களின் மூலம் கனிமம் எடுத்து செல்வதைத் தடுக்கும் பொருட்டு உரிய வாகனத் தணிக்கை மேற்கொள்ளவும், 50 சதவீதம் பசுமை வரி செலுத்தாமல் அண்டை மாநிலங்களுக்கு கனிமங்களை எடுத்து செல்லும் வாகனங்கள் மீது அபராதம் மற்றும் குற்றவியல் நடவடிக்கையும் மேற்கொள்ளப்படும், என்றாா்.

கூட்டத்தில் சாா் ஆட்சியா் பிரியங்கா, ஆட்சியரின் நோ்முக உதவியாளா் (பொது) கோபு, கோட்டாட்சியா் ஷாஜகான், உதவி இயக்குநா் (கனிமம்), ஈஸ்வரன் மற்றும் காவல் துறை, வருவாய்த் துறை அலுவலா்கள் பங்கேற்றனா்.