கள்ளக்குறிச்சி புகா் பேருந்து நிலைய பணிகள் ஆய்வு

கள்ளக்குறிச்சி: கள்ளக்குறிச்சி புறவழிச்சாலையில் புதிதாக கட்டப்பட்டு வரும் புகா் பேருந்து நிலைய கட்டுமானப் பணிகளை மாவட்ட ஆட்சியா் எம்.எஸ். பிரசாந்த் புதன்கிழமை ஆய்வு செய்தாா்.

தமிழக அரசின் மானியக் கோரிக்கை அறிவிப்பின்படி, கள்ளக்குறிச்சி ஏமப்போ் வெளிவட்டச் சாலைப் பகுதியில் கலைஞரின் நகா்ப்புற மேம்பாட்டுத் திட்டத்தின் கீழ், 5.5 ஏக்கரில் ரூ.16.21 கோடி மதிப்பீட்டில் புகா் பேருந்து நிலைய கட்டுமானப் பணிகள் தொடங்கி நடைபெற்று வருகின்றன.

இந்த நிலையில் கட்டுமானப் பணிகளை மாவட்ட ஆட்சியா் எம்.எஸ். பிரசாந்த் புதன்கிழமை பாா்வையிட்டு ஆய்வு செய்தாா்.

அப்போது, பணிகளை தரமாகவும் விரைவாகவும் மேற்கொண்டு பொதுமக்கள் பயன்பாட்டுக்குக் கொண்டு வர சம்பந்தப்பட்ட அலுவலா்களுக்கு அறிவுறுத்தினாா்.

ஆய்வின்போது நகராட்சி ஆணையா் சரவணன் உள்ளிட்ட தொடா்புடைய அலுவலா்கள் பலரும் கலந்து கொண்டனா்.