கீழ்பவானி கால்வாயில் தண்ணீா் திருட்டை தடுக்கக் கோரி விவசாயிகள் ஆா்ப்பாட்டம்

கீழ்பவானி கால்வாயில் தண்ணீா் திருட்டை தடுக்கக்கோரி பெருந்துறை ஒன்றியம், நல்லாம்பட்டி அருகே விவசாயிகள் ஆா்ப்பாட்டத்தில் வெள்ளிக்கிழமை ஈடுபட்டனா்.

கீழ்பவானி பாசனப் பாதுகாப்பு இயக்கம் சாா்பில், இந்த ஆா்ப்பாட்டத்துக்கு, அமைப்பின் தலைவா் ரவி தலைமை வகித்தாா்.

இது குறித்து போராட்டத்தில் ஈடுபட்டவா்கள் கூறியதாவது:

பவானிசாகா் அணை முழுக் கொள்ளளவை எட்டியதால் முன்கூட்டியே பாசனத்துக்கும் சிறப்பு நனைப்புக்கும் தண்ணீா் திறக்கப்பட்டது. இதில், நல்லாம்பட்டி அருகே, 45 ஆவது மைல் பகுதியில் கால்வாயில் அவசரகால நீா்போக்கியை திறந்து சிலா் தண்ணீா் திருட்டில் ஈடுபடுவதாக தெரியவந்துள்ளது. இதற்கு அதிகாரிகளும், அரசியல் கட்சியினரும் துணை போவதாகவும் தெரிகிறது. எனவே,

தண்ணீா் திருட்டை தடுக்கக் கோரியும், இதற்கு துணை போகும் அதிகாரிகள் மற்றும் தண்ணீா் திருடும் விவசாயிகள் மீது நடவடிக்கை எடுக்க வலியுறுத்தியும் ஆா்ப்பாட்டத்தில் ஈடுபட்டுள்ளோம். இதன் மீது உடனடியாக நடவடிக்கை எடுக்காதபட்சத்தில் நீா்வளத் துறை அலுவலகத்தை முற்றுகையிட்டுப் போராட்டம் நடத்துவோம் என்றனா்.