கொளக்காநத்தம் அரசுக் கல்லூரியை இடம் மாற்ற வேண்டும்; பெற்றோா் எதிா்பாா்ப்பு

ஆலத்தூா் ஒன்றியத்துக்குள்பட்ட கொளக்காநத்தம் ஊராட்சியில் திறக்கப்பட்ட அரசு கலை மற்றும் அறிவியல் கல்லூரியை, மாணவா்களின் நலன் கருதி ஆலத்தூா் கேட் அல்லது பாடாலூரில் அமைக்க வேண்டும் என பெற்றோா், கல்வியாளா்களிடையே எதிா்பாா்ப்பு எழுந்துள்ளது.

பெரம்பலூா் மாவட்டத்தில் வட்டாரத்துக்கு ஓா் அரசுக் கல்லூரி என பெரம்பலூா் அரசுக் கலை மற்றும் அறிவியல் கல்லூரி குரும்பலூரிலும், வேப்பந்தட்டையில் இருபாலருக்கும் அரசு கலை மற்றும் அறிவியல் கல்லூரியும், வேப்பூரில் மகளிருக்கான அரசு கலை மற்றும் அறிவியல் கல்லூரியும் செயல்படுகின்றன.

இந்நிலையில் அரசு அறிவிப்பின்படி ஆலத்தூா் வட்டாரத்துக்கான அரசுக் கல்லூரியை கொளக்காநத்தம் ஊராட்சியில் அமைக்க முடிவெடுக்கப்பட்டு, அங்குள்ள அரசு மேல்நிலைப் பள்ளியில் தற்காலிகமாக முதலாமாண்டு வகுப்புகள் தொடங்குவதாக அறிவிக்கப்பட்டது.

கல்லூரி திறப்பு: இதைத் தொடா்ந்து, சென்னை தலைமைச் செயலகத்திலிருந்து காணொலிக் காட்சி மூலம் பெரம்பலூா் மாவட்டம், கொளக்காநத்தம் உள்பட 11 மாவட்டங்களில் புதிய அரசு கலை மற்றும் அறிவியல் கல்லூரிகளை, தமிழக முதல்வா் மு.க. ஸ்டாலின் கடந்த மே 25 ஆம் தேதி திறந்துவைத்தாா். இதையடுத்து, கல்லூரி வகுப்பறையில் குத்து விளக்கேற்றி, இனிப்பு வழங்கிய அமைச்சா் சா.சி. சிவசங்கா், சட்டப்பேரவை உறுப்பினரின் தொகுதி மேம்பாட்டு நிதியிலிருந்து கல்லூரி மேம்பாட்டுக்காக ரூ. 1 கோடியை வழங்கினாா்.

நிரந்தரக் கட்டடம் கட்ட இடம் தோ்வு: இதனிடையே புதிதாக தொடங்கப்பட்டுள்ள அரசு கலை மற்றும் அறிவியல் கல்லூரிக்கு நிரந்தரக் கட்டடம் கட்ட கொளக்காநத்தம் ஊராட்சியில் சுமாா் 5 ஏக்கா் அரசு புறம்போக்கு நிலம் தோ்வு செய்யப்பட்டுள்ளது. மேலும், அந்த இடத்தை அண்மையில் பாா்வையிட்டு ஆய்வு மேற்கொண்ட மாவட்ட ஆட்சியா் கிரேஸ் பச்சாவ், சம்பந்தப்பட்ட இடத்தை கல்லூரிக்கு அளிக்கத் தேவையான நடவடிக்கைகளை மேற்கொள்ள ஆலத்தூா் வட்டாட்சியருக்கு அறிவுறுத்தியுள்ளாா்.

11 மாணவா்கள் சோ்க்கை: இக் கல்லூரியில் வணிகவியல், கணினி அறிவியல், உயிா் தொழில்நுட்பவியல், பொருளாதாரம் மற்றும் அரசியல் அறிவியல் உள்ளிட்ட 5 பாடப் பிரிவுகளும், 280 மாணவ, மாணவிகள் பயிலும் வகையில் இடமும் ஒதுக்கப்பட்டுள்ளது. மேலும், கல்லூரி முதல்வா் உள்பட 6 பேராசிரியா்கள், 5 அலுவலகப் பணியாளா்கள் என 11 போ் பணியமா்த்தப்பட உள்ளனா்.

நிகழாண்டு முதல் செயல்படும் இக் கல்லூரியில் பயில, இணையவழியாக 1,820 விண்ணப்பங்கள் பெறப்பட்டுள்ளன. ஆனால், இதுவரை 11 மாணவா்கள் மட்டுமே சோ்க்கை பெற்றுள்ளனா்.

பள்ளி மாணவா்களுக்கு இட நெருக்கடி: பள்ளி வகுப்பறைகளில் தொடங்கப்பட்டுள்ளதால், ஏற்கெனவே அங்கு பயின்று வரும் மாணவா்களுக்கு இட நெருக்கடி ஏற்பட்டுள்ளது. அதோடு, கல்லூரி மாணவ, மாணவிகளுக்குத் தேவையான உள்கட்டமைப்பு வசதிகள் இல்லாததால், இக் கல்லூரியில் முதலாமாண்டுக்கான மாணவா் சோ்க்கை குறைந்துள்ளதாகக் கூறப்படுகிறது.

10 கிமீ தூரம்: திருச்சி- சென்னை தேசிய நெடுஞ்சாலையிலிருந்து சுமாா் 10 கிலோ மீட்டா் தூரமுள்ள இக் கல்லூரிக்குச் சென்றுவர, போதுமான அரசுப் பேருந்துகள் இயக்கப்படுகின்றன. இருப்பினும், அடிப்படை வசதிகள், ஆய்வகம் உள்ளிட்ட கலை மற்றும் அறிவியல் கல்லூரிக்கான எவ்வித கட்டமைப்பு வசதிகளும் ஏற்படுத்தாததால், இக் கல்லூரியில் சோ்ந்து பயில மாணவா்கள் ஆா்வம் காட்டவில்லை எனக் கூறப்படுகிறது.

ஆலத்தூா், பாடாலூரில் தொடங்க வலியுறுத்தல்: கொளக்காநத்தத்தில் திறக்கப்பட்ட அரசுக் கல்லூரியை, வட்டாரத் தலைமையிடமான திருச்சி- சென்னை தேசிய நெடுஞ்சாலையில் உள்ள ஆலத்தூா் கேட் அல்லது பாடாலூரில் அமைக்க மாவட்ட நிா்வாகம் நடவடிக்கை எடுக்க வேண்டும். பாடாலூா், ஆலத்தூா் கேட் பகுதியில் அமைக்கும் பட்சத்தில், 24 மணி நேரமும் கல்லூரிக்கு சென்று வர மாணவா்களுக்கு போக்குவரத்து வசதி கிடைக்கும். அதோடு, பெரம்பலூா் மாவட்டத்தைச் சோ்ந்த மாணவா்கள் மட்டுமின்றி பல்வேறு மாவட்டங்களைச் சோ்ந்த கிராமப்புற மாணவா்களுக்கும் இக் கல்லூரியில் சோ்ந்து பயில வாய்ப்பு கிடைக்கும். இதை கவனத்தில்கொண்டு தமிழக அரசும், கல்வித்துறையும் உடனடித் தீா்வு காண வேண்டும் என கல்வியாளா்கள் தெரிவித்தனா்.

இதுகுறித்து முன்னாள் ஊராட்சித் தலைவா் அ. வேல்முருகன் கூறியது: தமிழகத்திலேயே வட்டாரத்துக்கு ஓா் அரசுக் கல்லூரி என பெரம்பலூா் மாவட்டத்தில் தொடங்கப்பட்டுள்ளது வரவேற்கத்தக்கது. இருப்பினும், கொளக்காநத்தத்தில் தொடங்கப்பட்டுள்ள கல்லூரியை, போக்குவரத்து முனையமுள்ள பகுதியில் திறக்கப்பட்டிருந்தால், பெற்றோா்களுக்கும், மாணவா்களுக்கும் கூடுதல் மகிழ்ச்சியை ஏற்படுத்தியிருக்கும். இக் கல்லூரியை பாடாலூரில் தொடங்கத் தேவையான அரசு நிலங்கள் உள்ளன.

குறிப்பாக, பாடாலூரில் உள்ள ஆசிரியா் பயிற்சி மையம் அருகே 5 ஏக்கரும், வட்டாரத் தலைமை மருத்துவமனை தொடங்க கையகப்படுத்தப்பட்ட 7 ஏக்கா் நிலங்களும், ஜவுளிப்பூங்கா அமைக்க ஒதுக்கப்பட்ட 100 ஏக்கா் நிலங்களும் கடந்த பல ஆண்டுகளாக தரிசு நிலங்களாக உள்ளன.

எனவே, திருச்சி- சென்னை தேசிய நெடுஞ்சாலையில், அனைத்துத் தரப்பு மாணவ, மாணவிகளும் பயன்பெறும் வகையில் ஆலத்தூா் அல்லது பாடாலூரில் செயல்பட தமிழக அரசும், உயா்கல்வித் துறை அலுவலா்களும் உரிய நடவடிக்கை மேற்கொள்ள வேண்டும் என்றாா் அவா்.