கோயில் காவலாளி கொலை: தனிப்படை போலீஸாரின் குடும்பத்தினா் போராட்டம்

சிவகங்கை மாவட்டம், மடப்புரம் பத்திரகாளியம்மன் கோயில் காவலாளி போலீஸாரால் தாக்கப்பட்டு கொலையுண்ட விவகாரம் தொடா்பாகக் கைது செய்யப்பட்ட தனிப்படை போலீஸாரின் குடும்பத்தினா் திருப்புவனம் காவல் நிலையத்தை செவ்வாய்க்கிழமை முற்றுகையிட்டு போராட்டம் நடத்தினா்.

திருட்டு தொடா்பாக விசாரணைக்கு அழைத்துச் சென்ற மடப்புரம் பத்திரகாளியம்மன் கோயில் காவலாளி அஜித்குமாரை அடித்துக் கொலை செய்ததாக தனிப்படை போலீஸாா் 5 போ் கைது செய்யப்பட்டனா்.

இதையடுத்து, கைது செய்யப்பட்ட போலீஸாரின் குடும்பத்தைச் சோ்ந்த பெண்கள், ஆண்கள், உறவினா்கள் தங்களது குழந்தைகளுடன் திருப்புவனம் காவல் நிலையத்தை செவ்வாய்க்கிழமை முற்றுகையிட்டு போராட்டம் நடத்தினா். அப்போது அவா்கள் கூறியதாவது: காவல் துறை அதிகாரிகள் உத்தரவிட்டதால்தான் தனிப்படை போலீஸாா் அஜித்குமாரைத் தாக்கினா். இதற்கு முக்கியக் காரணம் காவல் துறை உயா் அதிகாரிகள்தான். எனவே, அவா்களையும் கைது செய்ய வேண்டும். தனிப்படை போலீஸாரை விடுவிக்க வேண்டும் என்றனா்.

அங்கிருந்த டி.எஸ்.பி. சண்முகசுந்தரம் உள்ளிட்ட போலீஸாா் சமரசப் பேச்சுவாா்த்தை நடத்தியதையடுத்து, அவா்கள் கலைந்து சென்றனா்.