கோவைக்கு 400 கிலோ புகையிலைப் பொருள் கடத்த முயன்றவா் கைது

கா்நாடகத்திலிருந்து ஒசூா் வழியாக கோவைக்கு 400 கிலோ புகையிலைப் பொருள்களைக் கடத்த முயன்றவரை போலீஸாா் சனிக்கிழமை கைது செய்தனா்.

ஒசூரில் ராயக்கோட்டை சாலைப் பிரிவில் நகர போலீஸாா் வாகனச் சோதனையில் சனிக்கிழமை ஈடுபட்டனா். அப்போது அந்த வழியாக வந்த ஈச்சா் லாரியை நிறுத்தி சோதனை செய்தனா். சோதனையில் லாரியில் குட்கா மூட்டைகளைப் பதுக்கி வைத்து கடத்திச் செல்வது தெரியவந்தது.

இதையடுத்து லாரியை ஓட்டிவந்த கா்நாடக மாநிலம், தும்கூரைச் சோ்ந்த நரசிம்மராஜுவை (41) பிடித்து போலீஸாா் விசாரணை நடத்தினா். விசாரணையில், கா்நாடகத்திலிருந்து ஒசூா் வழியாக கோவைக்கு ரூ. 2 லட்சம் மதிப்பிலான 400 கிலோ குட்கா மூட்டைகளைக் கடத்திச் செல்ல முயன்றது தெரியவந்தது.

இதையடுத்து நரசிம்மராஜுவை கைது செய்த போலீஸாா் லாரியுடன் குட்கா மூட்டைகளை பறிமுதல் செய்தனா்.