சத்தீஸ்கரில் கடத்தப்பட்ட குழந்தை மீட்பு

சத்தீஸ்கரில் கடத்தப்பட்ட குழந்தையை அம்மாநில போலீஸாா் 13 நாள்களுக்குப் பின்னா் மயிலாடுதுறை ரயில்வே பாதுகாப்புப் படையினா் உதவியுடன் வியாழக்கிழமை மீட்டு, தாயிடம் ஒப்படைத்தனா்.

சத்தீஸ்கா் மாநிலம் துா்க் ரயில் நிலையத்தில் கடந்த ஜூலை 26-ஆம் தேதி அம்மாநிலத்தைச் சோ்ந்த சோனு மாணிக்புரி என்ற பெண், கணவா் மற்றும் இரண்டு குழந்தைகளுடன் ரயிலில் வெளியூா் செல்வதற்காக வந்தவா், இரவு 10 மணியளவில் ரயில் நிலையத்தில் உறங்கியுள்ளாா். அதிகாலை 4 மணிக்கு எழுந்து பாா்த்தபோது, அவரது 18 மாத குழந்தை காா்த்திக்கை காணவில்லையாம்.

இதுகுறித்த புகாரின்பேரில் துா்க் ஜிஆா்பி புறக்காவல் நிலைய போலீஸாா் வழக்குப் பதிவு செய்து விசாரணை மேற்கொண்டனா். ரயில் நிலைய கண்காணிப்புக் கேமராக்களை ஆய்வு செய்ததில் 45 வயது மதிக்கத்தக்க ஆண், குழந்தையை தூக்கிச் சென்றது தெரியவந்தது.

அந்த நபரின் புகைப்படத்தை வைத்து விசாரித்தபோது, அவா் தஞ்சாவூா் மாவட்டம், திருவிடைமருதூா் சாத்தனூரை சோ்ந்தவா் என்பதும், சத்தீஸ்கரில் தங்கி போா்வெல் வேலைபாா்த்து வந்ததும் தெரியவந்தது. அவரை பிடிக்க, துா்க் ஜிஆா்பி காவல் நிலைய உதவி துணை ஆய்வாளா் ஜனக்லால் திவாரி உதவி கோரியதன் பேரில், மயிலாடுதுறை ரயில்வே பாதுகாப்புப் படை ஆய்வாளா் சுதிா்குமாா் உத்தரவின்படி, தலைமைக் காவலா் இளையராஜா அம்மாநில போலீஸாருக்கு உதவியதன் பேரில், கடத்தலில் ஈடுபட்ட ராஜேந்திரன் மகன் ஆறுமுகம் (45) கைது செய்யப்பட்டதுடன், அவரிடம் இருந்த குழந்தை மீட்கப்பட்டது. இதையடுத்து, சத்தீஸ்கரில் இருந்து வியாழக்கிழமை வந்த பெற்றோரிடம் குழந்தை ஒப்படைக்கப்பட்டது.