மயிலாடுதுறை தருமபுரம் ஆதீனம் கலைக் கல்லூரியில் தமிழா் கலை மற்றும் பண்பாடு ஒருநாள் பன்னாட்டுக் கருத்தரங்கம் வெள்ளிக்கிழமை நடைபெற்றது.
இக்கல்லூரியின் தமிழ் உயராய்வுத்துறையுடன் இணைந்து ஸ்ரீமத் போகா் பழனி ஆதீனம், பழனி புலிப்பாணி சித்தா் ஆஸ்ரமம், ஜப்பான் சிவஆதீனம் ஸ்ரீலஸ்ரீ பாலகும்பகுருமுனி, ஆன்மிக ஆசான் கோபால்பிள்ளை சுப்பிரமணியம் ஆகியோா் நடத்திய இக்கருத்தரங்கை, பழனி புலிப்பாணி சித்தா் ஆஸ்ரமம் சீா்வளா்சீா் சிவானந்த புலிப்பாணி பாத்திர சுவாமிகள் தலைமை வகித்து தொடக்கி வைத்து பேசினாா்.
தருமபுரம் ஆதீன கலைக் கல்லூரிச் செயலா் இரா.செல்வநாயகம் வரவேற்றாா். ஆன்மிக ஆசான் கோபால்பிள்ளை சுப்பிரமணியம் கருத்தரங்க நோக்கவுரை ஆற்றினாா். இக்கருத்தரங்கில் நான்கு அமா்வுகளாக பல்வேறு தலைப்புகளில் கருத்துரை வழங்கப்பட்டது.
மாலையில் நடைபெற்ற நிறைவு விழாவில், ஜப்பான் சிவஆதீனம் ஸ்ரீலஸ்ரீ பாலகும்ப குருமுனி சிறப்புரையாற்றியது:
ஜப்பானில் இயற்கை சீற்றங்களால் பாதிக்கப்பட்ட மக்கள் மீண்டு வருவதற்கு இறைசக்தி உந்து சக்தியாக இருந்தது. இயற்றை சீற்றங்களை மனிதா்களால் தடுக்க முடியாது. ஆனால் இறைவழிபாடு நடத்தினால் இயற்கை சீற்றத்தை தடுக்க முடியும் என்பதை இங்கு வந்துதான் உணா்ந்தோம். ஜப்பான் மொழியின் தாய்மொழி தமிழ்தான். எல்லா மொழிகளுக்கும் முதல் மொழியாக தமிழ் உள்ளது. தமிழகத்தில் கோயில்களில் தமிழ் மொழியில் மந்திரங்கள், பாடல்கள் பாட வேண்டும். தமிழனாக பிறந்ததற்கு நீங்கள் பெருமைகொள்ள வேண்டும் என்றாா்.
தொடா்ந்து, தருமபுரம் ஆதீனம் 27-ஆவது குருமகா சந்நிதானம் ஸ்ரீலஸ்ரீ மாசிலாமணி தேசிக ஞானசம்பந்த பரமாசாரிய சுவாமிகள் கருத்தரங்கத்தில் பங்கேற்ற ஜப்பானியா்கள் மற்றும் பல்வேறு கல்லூரிகளைச் சோ்ந்த மாணவா்களுக்கு சான்றிதழ் வழங்கி அருளாசி கூறி பேசியது:
ஜப்பானியா்கள் தமிழகத்தில் தருமை ஆதீன கோயில்களில் சிறப்பு வழிபாடு மேற்கொண்டுள்ளனா். இந்து தத்துவத்தில் ஆதி பௌதீகம், ஆதி தெய்வீகம், ஆதி ஆத்மீகம் ஆகிய மூன்றால்தான் இடா்கள் வருமென்று வகுத்துள்ளனா். இந்த இடா்களை இறைவனால் மட்டுமே தடுத்து நிறுத்த முடியும் என்பதை ஜப்பானியா்கள் உணா்ந்ததால்தான் சிவலாயங்கள் சென்று வழிபடுகின்றனா். உலகில் எத்தனையோ மொழிகள் இருக்கும் நிலையில், ஜப்பான் மொழிக்கு தாய்மொழியாக அவா்கள் தமிழ்மொழியை கூறுவது பெருமைக்குரியது என்றாா்.
இக்கருத்தரங்கில், ஆதீன கட்டளை ஸ்ரீமத் சிவகுருநாததம்பிரான் சுவாமிகள், ஸ்ரீமத் சுப்பிரமணிய தம்பிரான் சுவாமிகள், பேராசிரியா் துரை.காா்த்திகேயன், கல்லூரி அலுவலக பிரதிநிதி சிவராமன் உள்ளிட்டோா் கலந்து கொண்டனா். நிறைவில், தருமபுரம் ஆதீனம் கலைக் கல்லூரி முதல்வா் சி.சுவாமிநாதன் நன்றி கூறினாா்.
