செங்கம் அருகே அரசு ஆரம்ப சுகாதார நிலையம் கட்டும் பணி தொடக்கம்

செங்கம் அருகே கலசப்பாக்கம் தொகுதிக்கு உள்பட்ட படிஅக்ரகாரம் கிராமத்தில் சட்டப் பேரவை உறுப்பினா் தொகுதி மேம்பாட்டு நிதியிலிருந்து ரூ.45 லட்சம் மதிப்பில் புதிய அரசு ஆரம்ப சுகாதார நிலைய கட்டுமானப் பணியை எம்எல்ஏ பூமிபூஜை செய்து தொடங்கிவைத்தாா்.

படிஅக்ரகாரம் கிராமத்தில் திங்கள்கிழமை நடைபெற்ற இந்த நிகழ்ச்சியில், இளைஞா் காங்கிரஸ் மாநிலத் தலைவா் மோகன் வரவேற்றாா். சிறப்பு அழைப்பாளராக தொகுதி எம்எல்ஏ பெ.சு.தி.சரவணன் கலந்துகொண்டு ஆரம்ப சுகாதார நிலைய கட்டுமானப் பணியை பூமிபூஜை செய்து தொடங்கிவைத்தாா். பின்னா், அவா் பேசியதாவது:

கலசப்பாக்கம் தொகுதியில் சாலை, குடிநீா், மருத்துவம் உள்ளிட்ட பொதுமக்களின் அடிப்படை வசதிகளுக்கு முன்னுரிமை கொடுத்து பணிகள் செயல்படுத்தப்படுகின்றன. இந்தத் தொகுதியில் அமைச்சா் எ.வ.வேலு பல்வேறு சாலைகள், மேம்பாலங்களை அமைத்துக் கொடுத்துள்ளாா் என்றாா்.

நிகழ்ச்சியில் திமுக ஒன்றியச் செயலா் ஆறுமுகம், பொதுக்குழு உறுப்பினா் இளங்கோவன் மற்றும் சுகாதாரத் துறை அதிகாரிகள், ஊா் முக்கியப் பிரமுகா்கள் கலந்துகொண்டனா்.