உலகின் முதல் ஏஐ மசாஜ் சேவையை அறிமுகப்படுத்திய நிறுவனம்: மனித வேலைகளுக்கு சவாலா?
பெரம்பலூா் மாவட்டத்தைச் சோ்ந்த விவசாயிகள் தோட்டக்கலைத்துறை மூலம் செயல்படுத்தப்பட்டு வரும் சொட்டுநீா் பாசனம் அமைக்க விண்ணப்பிக்கலாம் என, மாவட்ட ஆட்சியா் ச. அருண்ராஜ் தெரிவித்துள்ளாா்.
இதுகுறித்து அவா் புதன்கிழமை வெளியிட்ட செய்திக் குறிப்பு:
பெரம்பலூா் மாவட்டத்தில் மத்திய, மாநில அரசு வழிகாட்டுதலின்படி விவசாயிகள் பயன் பெறும் வகையில், நுண்ணீா் பாசனம் செயல்படுத்த 2025-26 ஆம் நிதியாண்டில் 680 ஹெக்டேருக்கு ரூ. 4.76 கோடி நிதி ஒதுக்கீடு பெறப்பட்டது. இத் திட்டத்தில் சிறு, குறு விவசாயிகளுக்கு (2 ஹெக்டோ் வரை) கணக்கிடப்பட்ட அடிப்படையில் 100 சதவீத மானியமும், இதர விவசாயிகளுக்கு 75 சதவீத மானியமும் வழங்கப்படுகிறது. ஒரு விவசாயிக்கு அதிகபட்சமாக 5 ஹெக்டோ் வரை மானியம் அனுமதிக்கப்படுகிறது.
இத் திட்டத்தின் கீழ் பயன்பெற விரும்பும் விவசாயிகள் தங்களது நிலத்துக்கான சிட்டா, அடங்கல், நில வரைபடம், மண் மற்றும் நீா் ஆய்வு அறிக்கை, குடும்ப அட்டை நகல், ஆதாா் அட்டை நகல், பாஸ்போட் அளவு புகைப்படம் -2, சிறு, குறு விவசாயி என்பதற்கானச் சான்று ஆகிய ஆவணங்களுடன், சம்பந்தப்பட்ட வட்டார தோட்டக்கலை உதவி இயக்குநா் அலுவலகம் அல்லது இணையதளம் மூலமாக விண்ணப்பிக்கலாம்.
இத் திட்டத்தில், ஏற்கெனவே பயன் பெற்றுள்ள விவசாயிகள் தங்களுடைய மொத்த சொட்டுநீா் பாசன விண்ணப்ப தகவல்களையும், ஆதாா் எண் அல்லது நில புல எண் மற்றும் உட்பிரிவு எண் மூலம் அறிந்து பயன்பெறலாம். சொட்டுநீா் பாசனம் அமைத்து 7 ஆண்டுகள் நிறைவடைந்திருந்தால் புதுப்பித்துக் கொள்ளலாம். தெளிப்பு நீா் பாசனம் மூலம் ஏற்கெனவே மானியம் பெற்ற விவசாயிகள் 3 ஆண்டுகள் நிறைவுடைந்திருந்தால், மானியத்தில் சொட்டு நீா் பாசனம் மீண்டும் அமைத்துக் கொள்ளலாம்.
எனவே, இத் திட்டத்தின் கீழ் சொட்டுநீா் பாசன தகவல்களை அறிந்துகொண்டு பாசன வசதிகள் அமைத்து பயன்பெறுவதோடு, விவசாயிகளே நுண்ணீா் பாசன நிறுவனங்களை தோ்ந்தெடுக்கும் வசதியும் உள்ளது.
