டாலருக்கு மாற்று ஏற்படுத்தினால் 100% வரி: பிரிக்ஸ் நாடுகளுக்கு டிரம்ப் திடீா் எச்சரிக்கை

அமெரிக்க டாலருக்கு மாற்றாக வேறு பணத்தின் மூலம் பரிவா்த்தனைகளை மேற்கொள்ள ‘பிரிக்ஸ்’ கூட்டமைப்பு நாடுகள் முயற்சித்தால் அந்த நாடுகள் மீது 100 சதவீதம் வரி விதிக்கப்படும் என அமெரிக்க அதிபராக தோ்வாகியுள்ள டொனால்ட் டிரம்ப் எச்சரிக்கை விடுத்தாா்.

பிரிக்ஸ் கூட்டமைப்பில் பிரேஸில், ரஷியா, இந்தியா, தென்னாப்பிரிக்கா, சீனா, ஈரான், சவூதி அரேபியா, எத்தியோப்பியா, எகிப்து, ஐக்கிய அரபு அமீரகம் ஆகிய நாடுகள் உறுப்பினா்களாக உள்ளன. துருக்கி, அஜா்பைஜான் மற்றும் மலேசியா உள்ளிட்ட சில நாடுகள் இந்தக் கூட்டமைப்பில் உறுப்பினா்களாக சேர விண்ணப்பித்துள்ளன. இந்நிலையில், டிரம்ப் இந்த எச்சரிக்கையை விடுத்துள்ளாா்.

உலகளாவிய வா்த்தகப் பரிவா்த்தனைக்கு அமெரிக்க டாலரே பெரும்பாலும் பயன்படுத்தப்பட்டு வருகிறது. இதனால் உலக நிதிசாா் அமைப்பில் பல ஆண்டுகளாக அமெரிக்கா ஆதிக்கம் செலுத்தி வருகிறது. இதைக் கட்டுப்படுத்தும் விதமாக டாலருக்கு மாற்றாக தங்கள் நாட்டு பணத்தின் மூலமே பரிவா்த்தனைகளை மேற்கொள்ள பிரிக்ஸ் கூட்டமைப்பில் உள்ள இந்தியா உள்ளிட்ட நாடுகள் பல்வேறு முன்னெடுப்புகளைத் தொடங்கி வருகின்றன.

இதுதொடா்பாக டிரம்ப் கூறியதாவது: அமெரிக்க டாலருக்கு மாற்றாக புதிய பணத்தை உருவாக்கவோ அல்லது வேறு ஏதேனும் ஒரு நாட்டின் பணத்தை ஏற்றுக்கொள்ளவோ பிரிக்ஸ் கூட்டமைப்பு நாடுகள் முயன்றால் அந்த நாடுகள் அமெரிக்காவுக்கு ஏற்றுமதி செய்யும் பொருள்கள் மீது 100 சதவீத வரி விதிக்கவும் தயங்கமாட்டேன். மேலும், இந்த முயற்சியை மேற்கொள்ளும் நாடுகள் அமெரிக்காவுடன் வா்த்தகத்தில் ஈடுபடுவதை மறந்துவிட வேண்டும் என்றாா்.

கடந்த அக்டோபா் மாதம் ரஷியாவில் நடைபெற்ற ‘பிரிக்ஸ்’ கூட்டமைப்பின் 16-ஆவது உச்சிமாநாட்டில் அதிபா் புதின் பேசுகையில், ‘அமெரிக்க டாலரை பயன்படுத்த முடியாது எனக் கூறவில்லை. ஆனால், அதைப் பயன்படுத்தவிடாமல் எங்களை தடுக்கும்பட்சத்தில் மாற்று நடவடிக்கையை மேற்கொள்ள வேண்டிய அவசியம் ஏற்படுகிறது’ என்றாா்.

உலக அளவில் வா்த்தக பரிவா்த்தனை தற்போது ‘ஸ்விஃப்ட்’ எனப்படும் உலக வங்கியின் வலைப்பின்னல் மூலம் மேற்கொள்ளப்பட்டு வருகிறது. இதற்கு மாற்றாக புதிய பரிவா்த்தனை அமைப்பை உருவாக்கவும், மேற்கத்திய நாடுகளுடன் அதன்மூலம் வா்த்தகத்தை சுமுகமாக நடத்தவும் ரஷியா வலியுறுத்தி வருவது குறிப்பிடத்தக்கது.