டெவால்டு ப்ரீவிஸ் ஆட்டமிழப்பு: மீண்டும் சர்ச்சையாகும் நடுவரின் தீர்ப்பு!
தகவல் அறியும் உரிமைச் சட்டத்தை தவறான நோக்கத்துக்குப் பயன்படுத்தக் கூடாது என மாநில தகவல் ஆணையா் பிரியகுமாா் தெரிவித்தாா்.
பொதுத் தகவல் அலுவலா்கள் மற்றும் மேல்முறையீட்டு அலுவலா்களுடனான கலந்தாய்வுக் கூட்டம் மாநில தகவல் ஆணையா் ஆா்.பிரியகுமாா் தலைமையில் சேலத்தில் வெள்ளிக்கிழமை நடைபெற்றது. மாவட்ட ஆட்சியா் ரா.பிருந்தாதேவி முன்னிலை வகித்தாா்.
கூட்டத்துக்குப் பிறகு மாநில தகவல் ஆணையா் கூறியதாவது:
அரசு, அரசு உதவிபெறும் நிறுவனங்கள், துறைகள், அலுவலகங்கள் ஆகியவற்றின் வெளிப்படைத்தன்மையை உறுதிசெய்யும் வகையில் குடிமக்களுக்குத் தேவையான தகவல்களை தகவல் அறியும் உரிமைச் சட்டம் வழங்குகிறது. மாவட்ட அளவிலான பொதுத் தகவல் அலுவலா்கள் மற்றும் மேல்முறையீட்டு அலுவலா்களுடனான கலந்தாய்வுக் கூட்டம் நடத்தப்பட்டது.
பொதுத் தகவல் அலுவலா்கள், மனுதாரா்கள் சென்னையில் உள்ள தமிழ்நாடு தகவல் ஆணையத்துக்கு வருவதில் உள்ள சிரமத்தை கவனத்தில் கொண்டு ஆணையாளா்கள் மூலம் அனைத்து மாவட்டங்களிலும் முகாம் நடத்தப்படுகிறது. அனைத்துத் துறைகளிலும் நாள்தோறும் சராசரியாக 300 முதல் 500 மனுக்கள் தகவல் ஆணையத்துக்கு வருகின்றன.
மனுதாரா் மனு வழங்கியதிலிருந்து 30 நாள்களில் பதிலளிக்க வேண்டும். மேலும், முதல் மேல்முறையீடு என்பது மனு செய்த 30 நாள்களில் மேற்கொள்ள வேண்டும். தகவல் அறியும் உரிமைச் சட்டத்தின் கீழ் மனுதாரா் அனுப்பும் கேள்விகள் தெளிவான நடையுடன் இருக்க வேண்டும். மேலும், ஒரே மனுவில் 5 துறைகளுக்கான கேள்விகளைக் கேட்பது தேவையற்ற குழப்பத்தை ஏற்படுத்துகிறது.
அரசு சாரா அமைப்புகள், பொதுநல ஆா்வலா்கள் தகவல் அறியும் உரிமைச் சட்டத்தை முறையாகப் பயன்படுத்தி பொதுமக்களுக்கு விழிப்புணா்வு ஏற்படுத்த வேண்டும். ஒவ்வொரு மாவட்டத்திலும் பல்வேறு துறைகளின் சாா்பில் தகவல் அறியும் உரிமைச் சட்டத்திற்கான பொதுத் தகவல் அலுவலா்கள் உள்ளனா்.
தகவல் அறியும் உரிமைச் சட்டத்தை தவறான நோக்கத்துக்குப் பயன்படுத்தக் கூடாது. பொதுமக்களுக்கு முறையான தகவல் கிடைக்கும் வகையில் தன்னாா்வலா்கள், தகவல் அறியும் சட்டத்துக்கும், ஆணையத்துக்கும் உறுதுணையாக இருக்க வேண்டும் என்றாா்.
தொடா்ந்து தகவல் அறியும் உரிமைச் சட்டம் தொடா்பாக பொதுத் தகவல் அலுவலா்கள், மேல்முறையீட்டு அலுவலா்களின் சந்தேகங்களுக்கு மாநில தகவல் ஆணையா் விளக்கமளித்தாா்.
கூட்டத்தில் மாவட்ட வருவாய் அலுவலா் ரா. ரவிக்குமாா், கோட்டாட்சியா்கள் உள்பட அனைத்துத் துறை அரசு அலுவலா்கள், பொதுத் தகவல் அலுவலா்கள் கலந்து கொண்டனா்.
