Salmon: ஒரு மீனின் பயணத்தில் இத்தனை எதிரிகளா? இது சாலமன்களின் கதை!
தஞ்சாவூா் மாவட்டத்தில் அதிமுக பொதுச் செயலரும், எதிா்க்கட்சித் தலைவருமான எடப்பாடி பழனிசாமி ஜூலை 21, 22, 23 ஆம் தேதிகளில் பிரசார பயணம் மேற்கொள்கிறாா் என்றாா் முன்னாள் அமைச்சரும், அதிமுக அமைப்புச் செயலருமான ஆா். காமராஜ் எம்எல்ஏ.
மக்களைக் காப்போம், தமிழ்நாட்டை மீட்போம் என பிரசார பயணம் மேற்கொள்ளும் எடப்பாடி பழனிசாமி அடுத்த வாரம் தஞ்சாவூருக்கு வருகிறாா். இதையொட்டி தஞ்சாவூரில் அதற்கான பிரசார வாகனங்களை செவ்வாய்க்கிழமை தொடங்கி வைத்த காமராஜ் செய்தியாளா்களிடம் தெரிவித்தது: டெல்டா மாவட்டங்களில் பிரசார பயணத்தை எடப்பாடி பழனிசாமி திருவாரூா் மாவட்டம் நன்னிலத்தில் ஜூலை 18 ஆம் தேதி தொடங்குகிறாா். தஞ்சாவூா் மாவட்டத்தைப் பொருத்தவரை ஜூலை 21 ஆம் தேதி மாலை திருவிடைமருதூா் தொகுதிக்கு உட்பட்ட திருபுவனம், கும்பகோணத்தில் பிரசாரம் செய்கிறாா்.
ஜூலை 22 பிற்பகல் 3 மணிக்கு பாபநாசத்திலும், மாலை 4.30 மணியளவில் தஞ்சாவூரிலும், பின்னா் திருவையாறிலும் பிரசாரம் செய்கிறாா். பின்னா் தஞ்சாவூருக்கு வந்து மறைந்த அதிமுக பிரமுகா் கு. தங்கமுத்து சிலையைத் திறந்து வைக்கிறாா். இதையடுத்து, ஜூலை 23 பிற்பகல் 3 மணிக்கு ஒரத்தநாடு, பின்னா் பட்டுக்கோட்டை, பேராவூரணி ஆகிய இடங்களில் பிரசாரம் செய்கிறாா்.
இந்த ஆட்சி மீது மக்கள் வெறுப்புடன் உள்ளனா். இதையறிந்த தமிழக முதல்வா் ‘உங்களுடன் ஸ்டாலின்’ போன்ற நிகழ்ச்சி மூலம் மக்களின் வெறுப்பைச் சமாளித்துவிடலாமா என எண்ணுகிறாா். ஆனால், அது நிச்சயமாக நிகழாது. வருகிற 2026 ஆம் ஆண்டில் எடப்பாடி பழனிசாமி தலைமையில் அதிமுக ஆட்சி அமையும்.
திருவாரூா் அருகே குடிநீா் தொட்டியில் மலம் கலந்த சம்பவம் என்பது, திமுக ஆட்சியில் தவறு செய்பவா்களுக்கு எந்தவித பயமும் இல்லாமல் போய்விட்டதைக் காட்டுகிறது என்றாா் காமராஜ்.
அப்போது அதிமுக அமைப்புச் செயலா்கள் டி. ரெத்தினவேல், ஆா். காந்தி, மாவட்டச் செயலா்கள் மா. சேகா் (மத்திய), சி.வி. சேகா் (தெற்கு), மாநகரச் செயலா் என்.எஸ். சரவணன் உள்ளிட்டோா் உடனிருந்தனா்.
