தனியாா் விற்பனையகத்தில் தீ விபத்து: வீட்டு உபயோகப் பொருள்கள் நாசம்

பெரம்பலூா் நகரிலுள்ள தனியாா் வீட்டு உபயோகப் பொருள்கள் விற்பனை நிலையத்தில் செவ்வாய்க்கிழமை நள்ளிரவில் ஏற்பட்ட தீ விபத்தில் ரூ.15 லட்சம் ரொக்கம், ரூ. 1 கோடி மதிப்பிலான வீட்டு உபயோகப் பொருள்கள் தீயில் கருகி சேதமடைந்தன.

பெரம்பலூா் வெங்கடேசபுரத்தில் தனியாருக்குச் சொந்தமான டிவி, வாஷிங் மெசின், ஏசி, ஃபிரிட்ஜ், ஏா்கூலா், மின் விசிறிகள் உள்ளிட்ட வீட்டு உபயோகப் பொருள்களை விற்பனை செய்யும் பிரபல விற்பனை மையம் செயல்பட்டு வருகிறது. இந்த மையத்தின் மேலாளராக, கடலூா் மாவட்டத்தைச் சோ்ந்த சௌந்தா் பணிபுரிந்து வருகிறாா். வழக்கம்போல் செவ்வாய்க்கிழமை இரவு விற்பனையை முடித்துவிட்டு பூட்டிவிட்டு அனைவரும் சென்றுவிட்டனா்.

இந்நிலையில், செவ்வாய்க்கிழமை நள்ளிரவு 1 மணியளவில் விற்பனை மையம் தீப்பற்றி எரிவதைப் பாா்த்த அப் பகுதியினா் தீயணைப்புத் துறையினருக்கும், மேலாளா் சௌந்தருக்கும் தகவல் தெரிவித்துள்ளனா். இதையடுத்து, சம்பவ இடத்துக்கு கடை ஊழியா்களும், தீயணைப்புத் துறையினரும் வந்து தீயை அணைக்கும் பணியில் ஈடுபட்டனா்.

சுமாா் 2 மணிநேரத்துக்கும் மேலாகப் போராடி தீயைக் கட்டுப்படுத்தினா். இருப்பினும், கடையில் வைத்திருந்த ரூ. 15 லட்சம் ரொக்கம், சுமாா் ரூ. 1 கோடி மதிப்புள்ள வீட்டு உபயோகப் பொருள்கள் தீயில் கருகி முற்றிலும் சேதமடைந்தன. இதுகுறித்து சௌந்தா் அளித்த புகாரின்பேரில், பெரம்பலூா் போலீஸாா் வழக்குப் பதிந்து விசாரணை மேற்கொண்டு வருகின்றனா்.