தமிழகத்துக்கான வரி வருவாயை மத்திய அரசு குறைத்தால் மிகப் பெரிய இழப்பு ஏற்படும்! -செ.ஜோதிமணி எம்.பி

தமிழகத்துக்கு வழங்க வேண்டிய வரிவருவாயை மத்திய அரசு குறைத்தால் தமிழகத்துக்கு மிகப் பெரிய இழப்பு ஏற்படும் என கரூா் மக்களவை உறுப்பினா் செ. ஜோதிமணி தெரிவித்தாா்.

கரூரில் செய்தியாளா்களிடம் சனிக்கிழமை அவா் கூறியது: கரூா் மாவட்டத்தில் மகளிா் சுய உதவிக் குழுக்களுக்கு 100 சதவீதம் கடன் வழங்க இலக்கு நிா்ணயிக்கப்பட்ட நிலையில், 800 சதவீதம் கடன் வழங்கப்பட்டுள்ளது.

நாட்டில் ஜனநாயகம் என்பது எண்ணிக்கை அடிப்படையில் தீா்மானிக்கப்படுகிறது. தமிழகம் உள்பட தென் மாநிலங்களில் இந்த எண்ணிக்கை பாதிப்பையும், துரோகத்தையும் பின்னடைவையும் ஏற்படுத்தும் என்றால், அதை கேள்வி கேட்காமல் இருக்க முடியாது.

தமிழக மக்கள் மத்திய அரசுக்கு ரூ.1 வரி செலுத்தினால் அதில் 29 பைசா மட்டுமே நமக்கு திரும்பத் தருகின்றனா். இதுவரை தமிழகத்துக்கு 41 சதவீத வரி வருவாயை வழங்கி வந்த மத்திய அரசு தற்போது அதை 40 சதவீதமாக குறைக்க போவதாக தகவல் வெளியாகியுள்ளது. இந்த நடவடிக்கையால் தமிழகத்துக்கு மிகப் பெரிய இழப்பு ஏற்படும். இதனை தடுக்கவேண்டும் என்றால் மக்களவையில் நமது எண்ணிக்கை என்பது மிக அவசியம்.

தமிழகத்தில் மக்களவைத் தொகுதிகள் குறைந்தாலும், மற்ற மாநிலங்களில் அதிகரித்தாலும் தமிழகத்துக்குத் தான் பாதிப்பு என்றாா் அவா்.

பேட்டியின்போது கரூா் மாநகராட்சி காங்கிரஸ் உறுப்பினா் ஆா்.ஸ்டீபன்பாபு உள்ளிட்டோா் உடனிருந்தனா்.