திருமயம் அருகே சமூக ஆா்வலா் ஜகபா்அலி கொலை செய்யப்பட்ட வழக்கில் 4 பேரை போலீஸாா் கைது செய்து திங்கள்கிழமை திருமயம் நீதிமன்றத்தில் ஆஜா்படுத்தி சிறையில் அடைத்தனா்.
புதுக்கோட்டை மாவட்டம், திருமயம் அருகே வெங்களூரைச் சோ்ந்தவா் சமூக ஆா்வலா் ஜகபா்அலி (58). முன்னாள் அதிமுக ஒன்றியக் குழு உறுப்பினரான இவா், திருமயம் சுற்றுவட்டாரப் பகுதிகளில் உள்ள சட்டவிரோத கல்குவாரிகள், மண் குவாரிகள் குறித்து அதிகாரிகளிடம் புகாா் அளிப்பது, போராட்டம் நடத்துவது, நீதிமன்றத்தில் வழக்கு தொடா்வது போன்றவற்றைச் செய்து வந்தாா். இந்நிலையில், கடந்த வெள்ளிக்கிழமை இருசக்கர வாகனத்தில் வந்த போது லாரி மோதியதில் உயிரிழந்தாா்.
இதுதொடா்பாக அவரது மனைவி மரியம் சனிக்கிழமை திருமயம் காவல் நிலையத்தில் அளித்த புகாரில், தனது கணவா் சாவில் சந்தேகம் இருப்பதாகவும், அந்தப் புகாரில் 4 பேரின் பெயா்களையும் குறிப்பிட்டிருந்தாா்.
இதையடுத்து விபத்து வழக்காகப் பதிவு செய்யப்பட்டு, பின்னா் சந்தேக மரணம் என்ற பிரிவில் மாற்றப்பட்டது. தொடா்ந்து நடைபெற்ற விசாரணையின் முடிவில், கொலை வழக்காக மாற்றம் செய்து 5 போ் மீது போலீஸாா் வழக்குப் பதிவு செய்தனா். இவா்களில் 4 பேரை போலீஸாா் பிடித்து விசாரணை மேற்கொண்டனா்.
விசாரணையின் முடிவில், ஜகபா்அலி மீது மோதிய லாரி உரிமையாளா் திருமயம் ஊத்துக்கேணி தெருவைச் சோ்ந்த சுந்தரபாண்டியன் மகன் முருகானந்தம் (56), அவரது ஓட்டுநரான ராமநாதபுரம் மாவட்டம், பிக்கிராந்தையைச் சோ்ந்த ராமதாஸ் மகன் காசிநாதன் (45), ஆா்.ஆா். கிரஷா் உரிமையாளா் துளையானூா் பாப்பாத்தி ஊரணியைச் சோ்ந்த ராமன் மகன் ராசு (54), அவரது மகன் தினேஷ் (24) ஆகிய 4 பேரை கைது செய்து, திருமயம் நீதித்துறை நடுவா் நீதிமன்றத்தில் திங்கள்கிழமை ஆஜா்படுத்தினா்.
இவா்கள் 4 பேரையும் 15 நாள் நீதிமன்றக் காவலில் அடைக்க நீதித்துறை நடுவா் கோபாலகண்ணன் உத்தரவிட்டதைத் தொடா்ந்து நால்வரும் புதுகை மாவட்டச் சிறையில் அடைக்கப்பட்டனா்.
தொடா்ந்து புகாா் செய்ததால் கொலை
இச் சம்பவம் நடந்தது குறித்து போலீஸாா் கூறியது: தொடா்ச்சியாக புகாா்களை அளித்து தொந்தரவு செய்து வந்த ஜகபா்அலியைக் கொல்ல, ஆா்.ஆா். கிரஷா் உரிமையாளா் ராசு மற்றும் அவரது மகன் தினேஷ் ஆகியோரின் தூண்டுதலின் பேரில், டிப்பா் லாரியின் உரிமையாளா் முருகானந்தம் லாரியைத் தானே ஓட்டி வந்து ஜகபா்அலி மீது மோதியுள்ளாா்.
அதன்பிறகு, முருகானந்தத்தை அவரது ஓட்டுநா் காசிநாதன் தனது இரு சக்கர வாகனத்தில் சம்பவ இடத்திலிருந்து வேறு இடத்துக்கு அழைத்துச் சென்றுள்ளாா்.
இந்த வழக்கில் தொடா்புடைய மற்றொரு குற்றவாளியான ஆா்.ஆா். கிரஷா் நிறுவனத்தின் பங்குதாரா் ராமையா (ராசுவின் சகோதரா்) தலைமறைவாகிவிட்டாா். இவா்கள் 5 போ் மீதும் கொலை மற்றும் கூட்டுச்சதி ஆகிய குற்றப் பிரிவுகளின்கீழ் வழக்குப் பதிவு செய்யப்பட்டுள்ளது என போலீஸாா் தெரிவித்தனா்.
கூட்டமைப்பு கோரிக்கை
சமூக ஆா்வலா் ஜகபா் அலி கொலை வழக்கை சிறப்புப் புலனாய்வுக் குழு (எஸ்ஐடி) அமைத்து விசாரணை நடத்த வேண்டும் என புதுக்கோட்டை மாவட்ட சுற்றுச்சூழல் மற்றும் சமூக ஆா்வலா்களின் கூட்டமைப்பு, பாஜக, இடதுசாரிகள், அதிமுக முன்னாள் அமைச்சா் சி. விஜயபாஸ்கா் ஆகியோா் வலியுறுத்தியுள்ளனா்.
