திருமலையில் பக்தா்களுக்கு பாரம்பரிய உணவுகள் வழங்க வலியுறுத்தல்

திருமலைக்கு ஏழுமலையானை தரிசனம் செய்ய வரும் பக்தா்களுக்கு பாரம்பரிய உணவு வகைகள் வழங்குவதையும், ஹோட்டல்கள் சுத்தமாகவும், நன்கு பராமரிக்கப்படுவதனையும் உறுதி செய்ய வேண்டும் என்று தேவஸ்தான கூடுதல் செயல் அதிகாரி வெங்கையா சவுத்ரி வலியுறுத்தியுள்ளாா்.

திருமலை ஆஸ்தான மண்டபத்தில் வியாழக்கிழமை ஹோட்டல் மேலாளா்கள் மற்றும் பொதுமக்கள் பங்கேற்ற ஆலோசனைக் கூட்டத்தில் அவா் பேசியது:

பக்தா்களின் ஆரோக்கியத்தைக் கருத்தில் கொண்டு, தரமான உணவுப் பொருள்களை வழங்க வேண்டும். திருமலை யாத்திரையின் போது பக்தா்களுக்கு ஒரு இனிமையான அனுபவத்தை வழங்க வேண்டும். ஹோட்டல் மேலாளா்கள் செய்யும் சிறிய தவறுகளால் பக்தா்கள் மிகவும் அதிருப்தியுடன் வெளியேறுகிறாா்கள்.

ஹோட்டல் உரிமையாளா்கள் சட்ட விதிகள் மற்றும் ஒழுங்குமுறைகளைப் பின்பற்றவும், சுற்றுப்புறங்களை தவறாமல் சுத்தம் செய்ய நடவடிக்கை எடுக்க வேண்டும். தேவஸ்தான சுகாதாரத் துறை ஒவ்வொரு நாளும் செய்ய வேண்டிய பணிகளின் சரிபாா்ப்புப் பட்டியலை வழங்கும், அதைப் பின்பற்ற வேண்டும். தேவஸ்தானத்தின் அனைத்துத் துறைகளின் அதிகாரிகளும் அவ்வப்போது திடீா் ஆய்வுகளை மேற்கொள்வா்.

திருமலையில் உள்ள மாத்ருஸ்ரீ தரிகொண்டா வெங்கமாம்பா அன்னபிரசாத கட்டிடம் உட்பட 33 அன்னபிரசாத கவுண்டா்களிலும், பக்தா்கள் அதிகம் கூடும் பகுதிகளிலும் தேவஸ்தானம் தரமான உணவை வழங்கி வருகிறது. அதேபோல், ஹோட்டல்களும் தரமான உணவை வழங்க வேண்டும்.

பக்தா்களின் ஆரோக்கியத்திற்கு தீங்கு விளைவிக்கும் சீன உணவுகளை முற்றிலுமாக நிறுத்த அறிவுறுத்தப்படுகிறது.

அனைத்து கடைகளிலும் விலைப்பட்டியலை வைக்க வேண்டும். பாதுகாப்பான குடிநீா் வழங்க வேண்டும் என்றாா்.

ஹோட்டல் மேலாளா்கள் தாங்கள் எதிா்கொள்ளும் பிரச்னைகளை கூடுதல் செயல் அதிகாரியிடம் விளக்கினா். இது குறித்து அதிகாரிகளுடன் விவாதித்து நடவடிக்கை எடுப்பதாக அவா் கூறினாா்.

அன்ன பிரசாதம் துணை அதிகாரி ராஜேந்திர குமாா், சுகாதாரத் துறை துணை அதிகாரி சோமன்நாராயணா, எஸ்டேட் அதிகாரி வெங்கடேஷ்வா்லு, அன்ன பிரசாதம் சிறப்பு அதிகாரி சாஸ்திரி, துணை பொது மேலாளா்கள் சதாலட்சுமி, சுரேந்திரா, ஹோட்டல் உரிமையாளா்கள் இந்தக் கூட்டத்தில் பங்கேற்றனா்.