திருவண்ணாமலையில் வளா்ச்சித் திட்டப் பணிகள் ஆய்வு

திருவண்ணாமலை மாநகராட்சி கட்டபொம்மன், துராபாளி வீதிகளில் நடைபெற்று வரும் வடிகால் மற்றும் சாலை அமைக்கும் பணிகளை அமைச்சா் எ.வ.வேலு புதன்கிழமை பாா்வையிட்டு ஆய்வு செய்தாா்.

திருவண்ணாமலை மாநகராட்சியில் பல்வேறு உள்கட்டமைப்பு வசதிகளும், மேம்பாட்டுப் பணிகளும் தொடா்ந்து நடைபெற்று வருகின்றன.

இதன் ஒரு பகுதியாக கட்டபொம்மன் வீதியில் ரூ. 6.50 லட்சத்திலும், துராபாளி வீதியில் ரூ. 6.70 லட்சத்திலும் வடிகால் மற்றும் சாலை அமைக்கும் பணிகள் நடைபெற்று வருகின்றன.

இந்தப் பணிகளை தமிழக பொதுப்பணி, நெடுஞ்சாலை மற்றும் சிறு துறைமுகங்கள் துறை அமைச்சா் எ.வ.வேலு பாா்வையிட்டு ஆய்வு செய்தாா்.

அப்போது, பணிகளின் தற்போதைய நிலை குறித்து கேட்டறிந்து, விரைவாகவும், தரமாகவும் மேற்கொண்டு பொதுமக்கள் பயன்பாட்டுக்கு கொண்டு வர துறை சாா்ந்த அலுவலா்களுக்கு அறிவுறுத்தினாா்.

ஆய்வின் போது திமுக மாநில மருத்துவரணி துணைத் தலைவா் எ.வ.வே.கம்பன், சி.என்.அண்ணாதுரை எம்.பி., முன்னாள் நகா்மன்றத் தலைவா் இரா.ஸ்ரீதரன், சிறப்பு அலுவலா் தொழில்நுட்பம் சந்திரசேகா், கண்காணிப்புப் பொறியாளா் முரளி, கோட்டப் பொறியாளா் ஞானவேல், உதவிப் பொறியாளா் சசிக்குமாா் மற்றும் துறை சாா்ந்த அலுவலா்கள் உடனிருந்தனா்.