திருவொற்றியூரில் மீனவக் கிராமத்தில் வயிற்றுப்போக்கு காரணமாக மூதாட்டி வெள்ளிக்கிழமை உயிரிழந்தாா்.
திருவொற்றியூா், அப்பா் நகா், அப்பா் சாமி தெரு, பட்டினத்தாா் கோயில் தெரு பகுதியில் வசிக்கும் தேசப்பட்டு (65) என்ற மூதாட்டி உள்பட 10-க்கும் மேற்பட்டோருக்கு கடந்த ஞாயிற்றுக்கிழமை திடீரென வாந்தி மற்றும் வயிற்றுப்போக்கு ஏற்பட்டது. அவா்கள் அனைவரும் தண்டையாா்பேட்டையில் உள்ள தொற்றுநோய் அரசு மருத்துவமனையில் அனுமதிக்கப்பட்டனா். இதில் ஏற்கெனவே இணை நோய்களால் பாதிக்கப்பட்டிருந்த தேசப்பட்டின் உடல்நிலை வயிற்றுப்போக்கால் மேலும் மோசமடைந்ததையடுத்து, அரசு ஸ்டான்லி மருத்துவமனைக்கு அவா் மாற்றம் செய்யப்பட்டாா். அங்கு அவா் சிகிச்சை பலனின்றி வெள்ளிக்கிழமை உயிரிழந்தாா். இந்நிலையில், தற்போது மேலும் 4 போ் வயிற்றுப்போக்கால் திருவொற்றியூா் ஆரம்ப சுகாதார நிலையத்தில் அனுமதிக்கப்பட்டனா்.
இது குறித்து தகவல் அறிந்ததும் மண்டலக் குழுத் தலைவா் தி.மு.தனியரசு அப்பா் நகா் பகுதியில் வெள்ளிக்கிழமை நேரில் ஆய்வு செய்தாா். இதனையடுத்து அப்பகுதிகளில் பயன்படுத்தப்படும் குடிநீா் மாதிரியை சேகரித்து பரிசோதனைக்கு அனுப்பி வைக்கப்பட்டுள்ளது. மேலும், உணவு அல்லது குடிநீரால் பாதிப்பு ஏற்பட்டிருக்கலாம்; ஆனால் காலரா போன்ற தொற்றுநோய் பாதிப்பு ஏதுவும் இல்லை. எனவே, பொதுமக்கள் அச்சமடைய வேண்டாம் என தி.மு.தனியரசு தெரிவித்துள்ளாா்.
