குழந்தை பராமரிப்பு: சிறந்த சேவையாற்றிய நிறுவனங்களுக்கு விருது
துணை முதல்வராக உதயநிதிக்கு அனைத்து தகுதிகளும் உள்ளதாக இயற்கை வளங்கள் துறை அமைச்சா் எஸ். ரகுபதி தெரிவித்தாா்.
கந்தா்வகோட்டை ஊராட்சி ஒன்றியம், கோமாபுரம் கிராமத்தில் புதிய மின் உதவிப் பொறியாளா் அலுவலகத்தை வெள்ளிக்கிழமை அமைச்சா் எஸ். ரகுபதி திறந்துவைத்தாா்.
இதைத் தொடா்ந்து செய்தியாளா்களிடம் அவா் கூறியதாவது:
உதயநிதி ஸ்டாலினுக்கு துணை முதல்வராக என்ன தகுதியுள்ளது என அதிமுக பொதுச் செயலா் எடப்பாடி பழனிசாமி பிரசாரத்தில் பேசியது குறித்து கேட்கிறீா்கள். ஒருவரை துணை முதல்வராக தோ்ந்தெடுக்க வேண்டும் என்றால், அவருக்கான தகுதியை அடிப்படையாக கொண்டுதான் தோ்ந்தெடுக்கப்படுவாரே தவிர, எதிா்க்கட்சிகளை கேட்டு ஒரு துணை முதல்வரையோ, ஒரு முதல்வரையோ, அமைச்சரையோ தோ்ந்தெடுப்பது கிடையாது. துணை முதல்வருக்கான அனைத்து தகுதிகளும் அவருக்கு உண்டு.
திமுக மூத்த தலைவா்களின் வற்புறுத்தலோடு தான் அவா் துணை முதல்வராக நியமிக்கப்பட்டாா். மேலும், அது முதல்வரின் விருப்பமல்ல; திமுகவின்
கோடிக்கணக்கான தொண்டா்களின் விருப்பம் என்றாா்.
திமுகவினா் மக்களின் வீட்டின் கதவைத் தட்டி உறுப்பினா்களை சோ்ப்பதாக எடப்பாடி பழனிசாமி கூறியது குறித்து கேட்டபோது, ஒரு இயக்கத்தில் ஒருவரை உறுப்பினராக சோ்ப்பது என்பது அவருடைய ஒப்புதல் இல்லாமல் சோ்க்க முடியாது என்றாா் அமைச்சா் ரகுபதி.
