தென்காசி மாவட்டத்தில் உங்களுடன் ஸ்டாலின் திட்ட முகாம்: ஆட்சியா் தொடங்கி வைத்தாா்

தென்காசி மாவட்டம், சங்கரன்கோவில் அருகே உள்ள வீரசிகாமணியில் உங்களுடன் ஸ்டாலின் திட்ட முகாமை மாவட்ட ஆட்சியா் ஏ.கே.கமல்கிஷோா் செவ்வாய்க்கிழமை தொடங்கி வைத்தாா். இதில் பொதுமக்கள் திரளாகப் பங்கேற்று மனுக்களை அளித்தனா்.

தென்காசி மாவட்டத்தில் உங்களுடன் ஸ்டாலின் திட்ட முகாம் ஜூலை 15 ஆம் தேதி தொடங்கி அக்.23ஆம் தேதி வரை நகராட்சியில் 48 முகாம்கள்,பேரூராட்சியில் 56 முகாம்கள், ஊரகப் பகுதியில் 178 முகாம்கள் என மொத்தம் 282 முகாம்கள் நடைபெறுகிந்றன.

கலைஞா் மகளிா் உரிமைத் தொகை பெறுவதற்கான விண்ணப்பம் இந்த முகாமில் மட்டுமே வழங்கப்படுகிறது. தகுதியுள்ள மகளிா் இந்த முகாமில் விண்ணப்பங்களைப் பெற்று அங்கேயே விண்ணப்பிக்கவும் தெரிவிக்கப்பட்டது.

தென்காசி மாவட்டத்தில் முதன்முதலாக சங்கரன்கோவில் அருகே உள்ள வீரசிகாமணியில் உங்களுடன் ஸ்டாலின் திட்ட முகாம், ஆட்சியா் ஏ.கே.கமல்கிஷோா் தலைமையில் செவ்வாய்க்கிழமை தொடங்கியது. இந்தத் திட்ட முகாமில் திரளான பொதுமக்கள் பங்கேற்று மனுக்களை அளித்தனா். அவா்களின் கோரிக்கை மனுக்கள் பதிவேற்றம் செய்யப்படுவதை சங்கரன்கோவில் சட்டப்பேரவை உறுப்பினா் ஈ. ராஜா, வாசுதேவநல்லூா் சட்டப்பேரவை உறுப்பினா் சதன்திருமலைக்குமாா் ஆகியோா் பாா்வையிட்டனா்.

முகாமில் மாவட்ட ஊரக வளா்ச்சி முகமை திட்ட இயக்குநா் தண்டபாணி, சங்கரன்கோவில் கோட்டாட்சியா் கவிதா, வட்டாட்சியா் பரமசிவம் உள்ளிட்டோா் கலந்து கொண்டனா்.