தேசிய பாரா தடகள சாம்பியன்ஷிப், ஆசியக் கோப்பை ட்ரையத்லான்: சென்னையில் நடைபெறுகிறது

தமிழ்நாடு விளையாட்டு மேம்பாட்டு ஆணையம், தேசிய பாராலிம்பிக் சங்கம், தமிழ்நாடு பாராலிம்பிக் சங்கம் சாா்பில் தேசிய பாரா தடகள சாம்பியன்ஷிப் மற்றும் ஆசிய ட்ரையாத்லான் கோப்பை போட்டிகள் சென்னையில் வரும் பிப்ரவரி மாதம் நடைபெறுகிறது.

இதுதொடா்பாக விளையாட்டுத் துறை கூடுதல் தலைமைச் செயலா் அதுல்ய மிஸ்ரா, எஸ்டிஏடி உறுப்பினா்-செயலா் ஜெ.மேகநாத ரெட்டி ஆகியோா் செவ்வாய்க்கிழமை கூறியது:

துணை முதல்வா் உதயநிதி ஸ்டாலின் அறிவுறுத்தலின்படி இப்போட்டிகள் நடத்தப்படவுள்ளன. தமிழ்நாடு விளையாட்டு மேம்பாட்டு ஆணையம் பிப்ரவரி மாதம் தமிழ்நாடு பாராலிம்பிக் சங்கத்துடன் இணைந்து 23-ஆவது தேசிய பாரா தடகள சாம்பியன்ஷிப் மற்றும் தமிழ்நாடு ட்ரையாத்லான் சங்கத்துடன் இணைந்து ஆசிய ட்ரையாத்லான் கோப்பை போட்டிகளை நடத்தவுள்ளது.

வரும் பிப். 17 முதல் 20 வரை சென்னை ஜவாஹா்லால் நேரு விளையாட்டரங்கில் நடைபெறவுள்ள தேசிய பாரா தடகள சாம்பியன்ஷிப் போட்டியில் இந்தியா முழுவதிலும் இருந்து 1,700-க்கும் மேற்பட்ட பாரா தடகள வீரா்-வீராங்கனைகள் பங்கேற்கவுள்ளனா். இந்த சாம்பியன்ஷிப் போட்டி மாற்றுத்திறனாளிகள் தங்கள் அசாதாரண திறன்கள் வெளிப்படுத்தும் ஒரு தளமாக அமையும்.

ஆசிய ட்ரையத்லான் கோப்பை: ஆசிய ட்ரையாத்லான் கோப்பை போட்டி பிப். 16-ஆம் தேதி சென்னை இந்திய கடற்படை கப்பல்) அடையாறில் நடைபெறும். சா்வதேச வீரா்கள் பங்குபெறும் இப்போட்டி 750 மீட்டா் நீச்சல், 20 கி. மீ சைக்கிளிங் மற்றும் 5 கி.மீ. ஓட்டம் ஆகிய பிரிவுகளில் நடத்தப்படும் எனத் தெரிவித்தனா்.

இதன் தொடா்ச்சியாக, தேசிய பாரா தடகள சாம்பியன்ஷிப் மற்றும் ஆசிய ட்ரையாத்லான் கோப்பை போட்டிகளுக்கான சின்னம் மற்றும் இலச்சினை வெளியிடப்பட்டது. நிகழ்ச்சியில் இந்திய பாராலிம்பிக் சங்கப் பொதுச் செயலாளா் ஜெயவந்த் குண்டு, தமிழ்நாடு பாராலிம்பிக் சங்கத்தின் செயலாளா் கிருபாகர ராஜா, தமிழ்நாடு ட்ரையாத்லான் சங்கத்தின் தலைவா் ராமச்சந்திரன், பாரிஸ் பாராலிம்பிக் வெள்ளி வீராங்கனை துளசிமதி முருகேசன், விளையாட்டு சங்க நிா்வாகிகள் மற்றும் அரசு அலுவலா்கள் கலந்துகொண்டனா்.