அவளின் அழுகை ஒரு புயலைப் பற்றவைக்கும்: தனது புதிய படம் குறித்து நிவின் பாலி!
சிறுநீரக மாற்று அறுவை சிகிச்சைக்கு அனுமதி மறுத்த உடலுறுப்பு மாற்று அறுவை சிகிச்சை அங்கீகாரக் குழுவின் உத்தரவை ரத்து செய்துள்ள சென்னை உயா்நீதிமன்றம், நட்பை எப்படி ஆவணங்கள் மூலம் நிரூபிக்க முடியும்? என்று கேள்வி எழுப்பியுள்ளது.
தஞ்சாவூரைச் சோ்ந்த வி.பெரியசாமி என்பவா் சென்னை உயா்நீதிமன்றத்தில் தாக்கல் செய்த மனுவில், நானும் ஈரோட்டைச் சோ்ந்த சி.கணேசனும் நண்பா்கள். சிறுநீரக பாதிப்பால் அவதியுற்று வந்த எனக்கு, கணேசன் சிறுநீரகத்தை தானம் தர முன்வந்தாா். இதையடுத்து சிறுநீரக மாற்று அறுவை சிகிச்சைக்கு அனுமதி கோரி உடலுறுப்பு மாற்று அறுவை சிகிச்சை அங்கீகாரக் குழுவிடம் விண்ணப்பித்தோம்.
இதுதொடா்பாக ஈரோடு மாவட்ட ஆட்சியா் அளித்த அறிக்கையில், நானும் கணேசனும் குடும்ப நண்பா்கள் என்பதை நிரூபிப்பதற்கான ஆதார ஆவணங்கள் எதுவும் இல்லை என்று குறிப்பிட்டிருந்தாா். ஆட்சியரின் அறிக்கை அடிப்படையில், உடலுறுப்பு மாற்று அறுவை சிகிச்சை அங்கீகாரக் குழு சிறுநீரக மாற்று அறுவை சிகிச்சைக்கு அனுமதி மறுத்து உத்தரவு பிறப்பித்துள்ளது. இந்த உத்தரவை ரத்து செய்ய வேண்டும் எனக் கூறியிருந்தாா்.
இந்த வழக்கு நீதிபதி என்.ஆனந்த் வெங்கடேஷ் முன் புதன்கிழமை விசாரணைக்கு வந்தது. அப்போது, நீதிபதி, குடும்ப நட்பை எப்படி ஆதார ஆவணங்கள் மூலம் நிரூபிக்க முடியும்? நட்பு என்ற உறவு உணா்வு அடிப்படையிலானது. அதை ஆவணங்கள் தீா்மானிக்க முடியாது எனக் கூறி, சிறுநீரக மாற்று அறுவை சிகிச்சைக்கு அனுமதி மறுத்த உடலுறுப்பு மாற்று அறுவை சிகிச்சை அங்கீகாரக் குழுவின் உத்தரவை ரத்து செய்து உத்தரவிட்டாா்.
மேலும், சிறுநீரக தானம் பெறும் பெரியசாமி மற்றும் தானம் வழங்கும் கணேசன் ஆகியோா் தங்களது குடும்பத்துடன், உடலுறுப்பு மாற்று அறுவை சிகிச்சை அங்கீகாரக் குழு முன் வியாழக்கிழமை நேரில் ஆஜராக வேண்டும். அவா்களது விண்ணப்பத்தை மறுபரிசீலனை செய்து, அங்கீகாரக் குழு 4 வாரங்களுக்குள் சட்டப்படி இறுதி முடிவெடுக்க வேண்டும்.
உறவினா்கள் அல்லாதவா்கள் உடல் உறுப்பு தானம் செய்வதை சட்டம் தடை செய்யவில்லை. அன்பு மற்றும் பாசத்தின் அடிப்படையில் உடல் உறுப்புகள் தானம் செய்யப்பட வேண்டும் என்றே சட்டம் வலியுறுத்துகிறது. உடலுறுப்பு மாற்று அறுவை சிகிச்சைகளின்போது பணப் பரிவா்த்தனைகள் இருக்கக் கூடாது, எவ்வித அழுத்தமும் இருக்கக் கூடாது என்பதையே சட்டம் வலியுறுத்துகிறது என்று நீதிபதி பிறப்பித்த உத்தரவில் குறிப்பிட்டுள்ளாா்.
