நிதி ஒதுக்கீட்டில் தமிழகத்தை வஞ்சிப்பது நியாயமா? -அமைச்சா் எ.வ.வேலு கேள்வி

திருக்குறள், செங்கோலைப் பற்றி பெருமையாகப் பேசும் பிரதமா் மோடி, நிதி ஒதுக்குவதில் மட்டும் தமிழகத்தை வஞ்சிப்பது நியாயம்தானா என மாநில பொதுப் பணி, நெடுஞ்சாலை மற்றும் சிறுதுறைமுகங்கள் துறை அமைச்சா் எ.வ.வேலு கேள்வி எழுப்பினாா்.

தமிழகத்தை தொடா்ந்து வஞ்சித்து வரும் மத்திய பாஜக அரசை கண்டித்து, விழுப்புரம் தெற்கு மாவட்ட திமுக சாா்பில் விழுப்புரம் நகராட்சித் திடல் பகுதியில் பொதுக்கூட்டம் சனிக்கிழமை மாலை நடைபெற்றது. கூட்டத்துக்கு மாவட்டப் பொறுப்பாளா் பொன்.கெளதமசிகாமணி தலைமை வகித்தாா். எம்எல்ஏக்கள் இரா.லட்சுமணன், அன்னியூா் அ.சிவா, மாவட்ட துணைச் செயலா்கள் தயா.இளந்திரையன், டி.என்.முருகன், இரா.கற்பகம் முன்னிலை வகித்தனா். இந்த கூட்டத்தில் அமைச்சா் எ.வ.வேலு பேசியது:

தமிழகத்துக்கு வந்த 15-ஆவது நிதிக்குழுவிடம் தமிழகத்துக்குத் தேவையான நிதி குறித்த விவரங்களை முதல்வா் மு.க.ஸ்டாலின் அளித்திருந்தாா். அந்தக் குழு அளித்த பரிந்துரையைக்கூட நிதிநிலை அறிக்கையில் மத்திய அரசு புறக்கணித்திருக்கிறது.

தமிழகம் மத்திய அரசுக்கு ஜிஎஸ்டி மூலம் ரூ.1 வரி செலுத்தினால், நமக்குத் திருப்பி அளிக்கப்படுவது 29 பைசா மட்டும்தான். அதே நேரத்தில், ரூ.1 வரி செலுத்தப்படும் பிகாா் மாநிலத்துக்கு ரூ.7.61, உத்தரப் பிரதேசத்துக்கு ரூ.2. 73, அஸ்ஸாமுக்கு ரூ.2.63, மத்தியப் பிரதேசத்துக்கு ரூ.2.42 திருப்பி வழங்கப்படுகிறது. ஆனால், தமிழகத்துக்கும் மட்டும் ஜிஎஸ்டி மூலம் திருப்பி அளிக்கப்படும் தொகையில் பாகுபாடு காட்டப்படுகிறது.

திருக்கு, செங்கோலைப் பற்றி பெருமையாக பேசும் பிரதமா் மோடி, தமிழகத்தை வஞ்சிப்பது ஏன்? நிதியை ஒதுக்குவதில் ஓரவஞ்சணை செய்வது ஏன்? விலைவாசி உயா்வைக் கட்டுப்படுத்த நடவடிக்கை எடுக்காதது ஏன்?

புதிய கல்விக் கொள்கையை ஏற்று கையொப்பமிட்டால்தான் அனைவருக்கும் கல்வி இயக்கத்தின் கீழ் தமிழகத்துக்கு வழங்கப்பட வேண்டிய ரூ.2,152 கோடியை வழங்க முடியும் என மத்திய அரசு கூறுகிறது. ஆனால், எந்த காரணம் கொண்டு புதிய கல்விக் கொள்கையை ஏற்க மாட்டோம் என முதல்வா் உறுதிபடக் கூறியிருக்கிறாா்.

தமிழக பல்கலைக்கழகங்கள் மாநில அரசின் நிதியில்தான் நடத்தப்படுகின்றன. நாம்தான் ஊதியம் தருகிறோம். ஆனால், துணைவேந்தரைத் தோ்வு செய்வதை நாங்கள் பாா்த்துக்கொள்வோம் என மத்திய அரசு கூறுகிறது. தமிழைக் காக்க, தமிழ் மக்களைக் காக்க எந்த எல்லைக்கும் செல்லத் தயாராக இருப்பவா் முதல்வா் ஸ்டாலின் என்றாா் வேலு.

கூட்டத்தில் தலைமைக் கழகப் பேச்சாளா் நாகம்மை கருப்பையா, தலைமைக்கழக வழக்குரைஞா் சுவை.சுரேஷ், ஒன்றியச் செயலா்கள் கல்பட்டு வி.ராஜா, பி.வி.ஆா்.சு.விசுவநாதன், பி.தெய்வசிகாமணி, தே.முருகவேல், வி.ஜி.பிரபாகரன், வளவனூா் பேரூா் செயலா் பா.ஜீவா, மாவட்ட இளைஞரணி அமைப்பாளா் செ.தினகரன், நகர இளைஞரணி அமைப்பாளா் செ.மணிகண்டன், நகா்மன்றத் தலைவா் தமிழ்ச்செல்வி பிரபு உள்ளிட்டோா் பங்கேற்றனா்.

முன்னதாக, மாவட்ட திமுக அவைத் தலைவரும், மாவட்ட ஊராட்சிக்குழுத் தலைவருமான ம.ஜெயச்சந்திரன் வரவேற்றாா். பெருநகரச் செயலா் இரா.சக்கரை நன்றி கூறினாா்.