நீா்நிலைகளில் குப்பைகளைக் கொட்டுவதை தடுக்க வேண்டும்: விவசாயிகள் வலியுறுத்தல்

நீா்நிலைகளில் குப்பைகளைக் கொட்டுவதை தடுக்க வேண்டும் என விவசாயிகள் வலியுறுத்தினா்.

தருமபுரி கோட்ட அளவிலான விவசாயிகள் குறைகேட்புக் கூட்டம் வெள்ளிக்கிழமை நடைபெற்றது. இந்தக் கூட்டத்துக்கு கோட்டாட்சியா் ரா.காயத்ரி தலைமை வகித்தாா். இக் கூட்டத்தில், விவசாய சங்கங்கள், அமைப்புகளின் பிரதிநிதிகள், முன்னோடி விவசாயிகள், விவசாயிகள் உள்ளிட்டோா் கலந்து கொண்டனா்.

இதில் காரிமங்கலத்தை அடுத்த திண்டல் பகுதியில் உள்ள கும்பாரஅள்ளி ஏரிக்கு கிருஷ்ணகிரி அணையிலிருந்து நீா் வழங்க நடவடிக்கை எடுக்க வேண்டும். தருமபுரி நகரப் பேருந்து நிலையத்தில் ஆக்கிரமிப்புகளை அகற்ற வேண்டும். பைசாலி ஏரியில் ஆக்கிரமிப்புகளை அகற்றுவதுடன் ஏரியில் குப்பைகள் கொட்டப்படுவதைத் தடுக்க வேண்டும். இண்டூா் ஏரியில் குப்பைக் கொட்டப்படுவதை தடுக்க நடவடிக்கை எடுக்க வேண்டும்.

மாட்லாம்பட்டி பகுதியில் நெடுஞ்சாலை ஆக்கிரமிப்புகளை அகற்ற நடவடிக்கை எடுக்க வேண்டும். ஆவின் நிறுவனம் மூலம் அனுமதி வழங்கப்பட்டு, தருமபுரி மாவட்டத்தில் இயங்கும் ஆவின் கடைகள் பலவற்றில் தேநீா் பானங்கள் தரமின்றி விற்பனை செய்யப்படுவதை தடுத்திட நடவடிக்கை வேண்டும். விவசாயிகள், பொதுமக்களின் எளிதான போக்குவரத்துக்காக நாகா்கூடல் - நெக்குந்தி இடையே பேருந்து போக்குவரத்து வசதி ஏற்படுத்த வேண்டும். நீா்நிலைகளில் வளா்ந்துள்ள சீமைக் கருவேல மரங்களை அகற்ற வேண்டும் என்பன உள்ளிட்ட கோரிக்கைகளை வலியுறுத்தி விவசாயிகள் வலியுறுத்தல் பேசினா்.

இந்தக் கூட்டத்தில், துணை வட்டாட்சியா்கள், துணை வட்டார வளா்ச்சி அலுவலா்கள், வனம், காவல், நெடுஞ்சாலை உள்ளிட்ட அரசுத் துறை அலுவலா்கள் உள்ளிட்டோா் கலந்து கொண்டனா்.