திருவாரூா் மாவட்டத்தில் பகலில் விவசாயத்துக்கான மின்மோட்டாா்களை இயக்க வேண்டும் என தமிழ்நாடு மின்பகிா்மானக் கழக மேற்பாா்வை பொறியாளா் பி. லதாமகேஸ்வரி தெரிவித்துள்ளாா்.
இதுகுறித்து, அவா் வெளியிட்டுள்ள செய்திக்குறிப்பு: விவசாயிகள், விவசாய மோட்டாா்களை இரவில் இயக்குவதிலிருந்து பகல் நேரத்தில் முழுமையாக இயக்க வேண்டும் என மின்சார ஒழுங்குமுறை ஆணையம் தெரிவித்துள்ளது.
பகலில் இலவசமாக கிடைக்கும் புதுப்பிக்கக்கூடிய இயற்கை வளமான சூரிய மின் ஆற்றலை பயன்படுத்தி உற்பத்தி செய்யப்படும் சூரிய ஒளி மின்சாரத்தை அதிகமாக பயன்படுத்துவதன் மூலம், பசுமை ஆற்றல் திட்டங்கள் ஊக்குவிக்கப்படுகிறது.
மேலும், மற்ற வளங்களைக் கொண்டு மின்னாற்றல் தயாரிக்கும்போது ஏற்படும் மாசுபாட்டின் அளவைக் குறைக்கவும், நமது நாட்டின் பொருளாதார வளா்ச்சி பாதையில் கொண்டு செல்லவும், பகலில் அதிகளவில் தயாரிக்கப்படும் சூரிய ஒளி மின்சாரத்தை பயன்படுத்த வேண்டும்.
அதற்காக, அனைத்து விவசாயிகளும் விவசாய மின்மோட்டாா்களை பகல் நேரங்களில் உபயோகப்படுத்த வேண்டும் எனத் தெரிவிக்கப்பட்டுள்ளது.
