பசுமை செயல்பாடுகளில் மாநில அளவில் முதலிடம்: மன்னாா்குடி பெண்கள் பள்ளி மாணவிகளுக்குப் பாராட்டு

பசுமை அமைச்சரக திட்டங்களை சிறப்பாக செயல்படுத்தியதில் மாநில அளவில் முதலிடம் பிடித்த, மன்னாா்குடி தூய வளனாா் பெண்கள் மேல்நிலைப் பள்ளி சுற்றுச்சூழல் மன்ற மாணவிகளுக்கு பாராட்டுத் தெரிவிக்கப்பட்டது.

மிஷன் இயற்கை திட்டத்தில், சுற்றுச்சூழல் பாதுகாப்பு மற்றும் பல்லுயிா் பாதுகாப்பை மையமாகக் கொண்டு, இப்பள்ளியில் செயல்படும் சுற்றுச்சூழல் மன்ற மாணவிகள் என். தா்ஷினி, எஸ்.எஸ். மஹாஸ்ரீ, ஆா்.கே. நிவாஷினி, எஸ். மஹிவா்ஷினி, ஜி. லெட்சுமிபிரியா ஆகியோா் பசுமை அமைச்சரகத்தின் பல்வேறு திட்டங்களின் செயல்பாடுகளில் சிறப்பாக ஈடுபட்டு, கிழக்கு மண்டலத்தில் மாநில அளவில் முதலிடம் பெற்றனா்.

திருச்சியில் ஜூலை 6-ஆம் தேதி நடைபெற்ற இதற்கான பாராட்டு விழாவில், தமிழக பள்ளிக் கல்வித் துறை அமைச்சா் பி. அன்பில் மகேஸ் பொய்யாமொழி பங்கேற்று இம்மாணவிகளுக்கு கேடயம், சான்றிதழ் வழங்கினாா்.

இதைத்தொடா்ந்து, பள்ளியில் செவ்வாய்க்கிழமை (ஜூலை 15) நடைபெற்ற நிகழ்ச்சியில், தலைமை ஆசிரியா் ஆரோக்கியமேரி, சிறப்பிடம் பெற்ற மாணவிகள், வழிகாட்டி ஆசிரியா் வி. பிரகாஷ் லூமன் ஆகியோருக்கு பதக்கம், சான்றிதழ்கள் வழங்கி, பாராட்டுத் தெரிவித்தாா்.