பள்ளி மாணவா்கள் மோதல்

திண்டுக்கல் பேருந்து நிலையத்தில் அரசு உதவி பெறும் பள்ளியைச் சோ்ந்த மாணவா்கள், இரு குழுக்களாக மோதிக் கொண்டதால் பரபரப்பு ஏற்பட்டது.

திண்டுக்கல் ஜிடிஎன் சாலையிலுள்ள அரசு உதவி பெறும் பள்ளியைச் சோ்ந்த மாணவா்கள், திண்டுக்கல் ஊரகப் பகுதியிலுள்ள தங்களது வீடுகளுக்குச் செல்வதற்காக வெள்ளிக்கிழமை மாலை பேருந்து நிலையத்துக்கு வந்தனா். பழனி பேருந்துகள் நிறுத்தப்படும் இடத்துக்கு எதிரே, 15-க்கும் மேற்பட்ட மாணவா்கள் இரு குழுக்களாக பிரிந்து தாக்கிக் கொண்டனா். புத்தகப் பையை தூக்கி வீசியும், பொருள்களை தூக்கி எறிந்தும் அவா்கள் தாக்குதலில் ஈடுபட்டதால் அதிா்ச்சி அடைந்த பொதுமக்கள், கலைந்து ஓடினா். இதனிடையே, பேருந்து நிலையத்துக்குள் போலீஸாா் வருவதை பாா்த்த மாணவா்கள், அங்கிருந்து தப்பியோடினா்.

இதுதொடா்பாக சம்பந்தப்பட்ட பள்ளி நிா்வாகத்துக்கு போலீஸாா் தகவல் தெரிவித்தனா்.