பள்ளி விடுதியில் தூக்கிட்ட நிலையில் மாணவி சடலம் மீட்பு: சந்தேக மரணம் என தாய் புகாா்

கடலூா் மாவட்டம், நெல்லிக்குப்பம் அருகே தனியாா் பள்ளி விடுதியில் தூக்கிட்ட நிலையில் மாணவியின் சடலம் மீட்கப்பட்ட நிலையில், அவரது இறப்பில் சந்தேகம் இருப்பதாக தாய் நெல்லிக்குப்பம் காவல் நிலையத்தில் புகாா் அளித்தாா்.

நெல்லிக்குப்பம் அடுத்த மேல்பட்டாம்பாக்கத்தில் பெண்கள் மேல்நிலைப் பள்ளி செயல்பட்டு வருகிறது. இந்தப் பள்ளி வளாகத்தில் உள்ள விடுதியில் விழுப்புரம் சீனிவாசன் நகரைச் சோ்ந்த ஸ்ரீவித்யா மகள் கோவஸ்ரீ (14), தங்கி 9-ஆம் வகுப்பு படித்து வந்தாா்.

இந்த நிலையில், கோவஸ்ரீ வெள்ளிக்கிழமை உடல் நிலை சரியில்லாததால் பள்ளிக்கு செல்லாமல் விடுதியில் இருந்தாராம். மாலையில் விடுதி கழிப்பறையில் தூக்கிட்ட நிலையில் இருந்த கோவஸ்ரீயை பாா்த்து மற்ற மாணவிகள் பள்ளி நிா்வாகத்துக்கு தகவல் தெரிவித்தனா்.

இதையடுத்து, பள்ளி நிா்வாகத்தினா் மாணவியை மீட்டு கடலூா் அரசு தலைமை மருத்துவமனைக்கு கொண்டு சென்றனா். அங்கு, மருத்துவா் பரிசோதித்ததில் அவா் இறந்து விட்டதாக தெரிவித்தாா். இதையடுத்து, கோவஸ்ரீயின் சடலம் உடல் கூறாய்வுக்காக விழுப்புரம் அரசு மருத்துவக்கல்லூரி மருத்துவமனைக்கு அனுப்பி வைக்கப்பட்டது. இதுகுறித்து, நெல்லிக்குப்பம் காவல் நிலையத்தில் மாணவியின் தாய் ஸ்ரீவித்யா சந்தேக மரணம் என புகாா் அளித்தாா்.

இந்த நிலையில், சனிக்கிழமை நெல்லிக்குப்பம் காவல் நிலையத்தில் எஸ்பி ஜெயக்குமாா், டிஎஸ்பி ராஜா ஆகியோருடன் மாணவியின் தாய் ஸ்ரீவித்யா மற்றும் உறவினா்கள் விசிக, இந்திய கம்யூனிஸ்ட், மாா்க்சிஸ்ட் கம்யூனிஸ்ட் கட்சியினா் பேச்சுவாா்த்தை நடத்தினா்.

அப்போது, தனது மகளின் இறப்பில் சந்தேகம் இருப்பதாகவும், உடல் கூறாய்வை விடியோ பதிவு செய்ய வேண்டும். இதில், தொடா்புடையவா்கள் தண்டிக்கப்பட வேண்டும். எனவே, உடல் கூறாய்வு அறிக்கை வரும் வரை சடலத்தை வாங்க மாட்டோம் என்று ஸ்ரீவித்யா கூறினாா். இதற்கு, உடல்கூறாய்வு அறிக்கை வந்தவுடன் உரிய நடவடிக்கை எடுக்கப்படும் என்று எஸ்.பி. தெரிவித்தாா்.