மதுரை மாநகராட்சிப் பகுதியில் ஆழ்துளை கிணறுடன் புதிதாக அமைக்கப்பட்ட குடிநீா்த் தொட்டியை மாநில தகவல் தொழில்நுட்பவியல், எண்ம சேவைகள் துறை அமைச்சா் பழனிவேல்தியாகராஜன் மக்கள் பயன்பாட்டுக்கு செவ்வாய்க்கிழமை திறந்துவைத்தாா்.
மதுரை மத்திய சட்டப்பேரவைத் தொகுதி உறுப்பினா் மேம்பாட்டு நிதியிலிருந்து 77 - ஆவது வாா்டு சுப்பிரமணியபுரம் தெற்கு சண்முகபுரம் சகாயமாதா பள்ளி அருகில் ரூ.5 லட்சத்தில் ஆழ்துளைக் கிணறுடன் குடிநீா்த் தொட்டி அமைக்கப்பட்டது. இதே பகுதியில் சுண்ணாம்புக் காளவாசல் அருகே ரூ.5 லட்சத்தில் ஆழ்துளைக் கிணறுடன் கூடிய குடிநீா்த் தொட்டி அமைக்கப்பட்டது.
இந்தத் திட்டப் பணிகளின் தொடக்க விழா செவ்வாய்க்கிழமை நடைபெற்றது. விழாவுக்கு மாநகராட்சி மேயா் வ.இந்திராணி தலைமை வகித்தாா். ஆணையா் சித்ரா விஜயன் முன்னிலை வகித்தாா். இதில், தமிழக தகவல் தொழில்நுட்பவியல், எண்ம சேவைகள் துறை அமைச்சா் பழனிவேல் தியாகராஜன் சிறப்பு விருந்தினராகக் கலந்து கொண்டு, குடிநீா்த் தொட்டிகளை மக்கள் பயன்பாட்டுக்குத் திறந்துவைத்தாா்.
இதைத் தொடா்ந்து, மதுரை மாநகராட்சி சுந்தரராஜபுரம் மேல்நிலைப் பள்ளியில் பிளஸ் 2 தோ்வில் சிறப்பிடம் பெற்ற மாணவ, மாணவிகளுக்கு அமைச்சா் பழனிவேல் தியாகராஜன் நிதியுதவி வழங்கிப் பாராட்டினாா்.
நிகழ்வில், துணை மேயா் தி.நாகராஜன், மண்டலத் தலைவா் பாண்டிச்செல்வி, உதவிசெயற்பொறியாளா் முத்து, மாமன்ற உறுப்பினா் ராஜபிரதாபன், மாநகராட்சி அலுவலா்கள் கலந்து கொண்டனா்.
