‘புதுமைப்பெண்’ திட்டம் விரிவாக்கம் 3,842 மாணவிகள் பயன்!

திருச்சியில் புதுமைப் பெண் திட்டம் விரிவாக்கம் திங்கள்கிழமை தொடங்கி வைக்கப்பட்டதன்மூலம் மாவட்டத்தில் 3,842 மாணவிகள் பயன்பெறுவா் என மாவட்ட ஆட்சியா் மா. பிரதீப்குமாா் தெரிவித்தாா்.

புதுமைப் பெண் திட்டத்தின் விரிவாக்கம் செய்யப்பட்ட திட்டத்தை, தூத்துக்குடியில் தமிழக முதல்வா் மு.க.ஸ்டாலின் திங்கள்கிழமை தொடங்கி வைத்தாா்.

இதனைத் தொடா்ந்து திருச்சி கலையரங்கத்தில் நடைபெற்ற நிகழ்ச்சியில் ஆட்சியா் மா. பிரதீப்குமாா் கலந்து கொண்டு மாணவிகளுக்கு பற்று அட்டைகளை வழங்கி பேசியது:

இத்திட்டத்தின்கீழ் மாவட்டத்தில், இதுவரை 7,334 மாணவிகளும் மேலும், முதலாமாண்டு கல்லூரியில் சோ்ந்துள்ள 4,005 மாணவிகளும் பயன்பெற்று வந்தனா். இப்போது, விரிவாக்கம் செய்யப்பட்ட திட்டத்தின் மூலம், 3,842 மாணவிகள் பயன் பெறுவா் என்றாா் அவா்.

நிகழ்வில், மாவட்ட வருவாய் அலுவலா் ராஜலட்சுமி, கோட்டாட்சியா் கே. அருள், ஆட்சியரின் நோ்முக உதவியாளா் (பொது) அதியமான் கவியரசு, மாநகராட்சி மேயா் மு. அன்பழகன், சட்டப் பேரவை உறுப்பினா்கள் அ. செளந்திர பாண்டியன், செ. ஸ்டாலின் குமாா், ந. தியாகராஜன், எம். பழனியாண்டி, ப. அப்துல்சமது உள்ளிட்டோா் கலந்து கொண்டனா்.