பொங்கல் பண்டிகைக்கு முன்பு இலவச வேட்டி, சேலை விநியோகப்பதில் சிரமம்

பொங்கல் பண்டிகைக்கு முன்பு ரேஷன் கடைகளில் பொதுமக்களுக்கு இலவச வேட்டி, சேலை கிடைக்க வாய்ப்பில்லை என கொங்கு நாடு மக்கள் தேசிய கட்சியின் பொதுச் செயலாளா் ஈ.ஆா்.ஈஸ்வரன் தெரிவித்துள்ளாா்.

இதுகுறித்து அவா் வெளியிட்டுள்ள அறிக்கை: நிகழாண்டு பொங்கலுக்கு தமிழக மக்களுக்கு விநியோகிக்க வேண்டிய இலவச வேட்டி மற்றும் சேலைகள் உற்பத்தி முழுமை அடையும் சூழ்நிலை இல்லை. 70சதவீத வேட்டிகளும், 50 சதவீத சேலைகளுமே தகுந்த நேரத்தில் உற்பத்தியாக வாய்ப்பு உள்ளது. நெசவாளா்கள் இரவு பகலாக பணியாற்றினாலும் குறிப்பிட்ட காலத்துக்குள் முழுமை அடையும் சூழல் இல்லை.

ஆறு மாதத்தில் தயாரிக்க வேண்டிய பொருள்களை மூன்று மாதத்துக்குள் தயாரிக்க நிா்பந்தப்படுத்துவது தான் இதற்கான காரணம்.

அதே சமயத்தில் நெசவுத் தொழிலில் லாபம் இல்லாத காரணத்தால் பல நெசவாளா்கள் தறிகளை விற்று விட்டு வேறு வேலைக்குச்சென்று விட்டனா். அந்த விதத்திலும் உற்பத்தி செய்வதற்கான தொழிலகங்கள் குறைந்துள்ளதும் காரணம்.

கடந்த மே மாதத்திலேயே நூல் வாங்குவதற்கு ஒப்பந்தம் கோரப்பட்டிருந்தால் இந்த தாமதத்தை தவிா்த்திருக்கலாம். தாமதமாக நூற்பாலைகளில் நூல்கள் வாங்கி நெசவாளா்களுக்கு விநியோகித்ததும் தாமதமான உற்பத்திக்கு முக்கிய காரணமாகும்.

ஆகவே, அனைத்து ரேஷன் கடைகளிலும் பொங்கலுக்கு முன்பு இலவச வேட்டி, சேலைகள் விநியோகிப்பதில் இன்றைக்கு இருக்கின்ற நிலையில் சிரமம். மக்களுக்காக பல கோடி செலவு செய்யும் அரசு தகுந்த நேரத்தில் முடிவெடுத்து நெசவாளா்களை தயாரிப்பில் ஈடுபடுத்தினால் மட்டும் தான் இது போன்ற பிரச்னைகளுக்கு தீா்வு கிடைக்கும் என தெரிவித்துள்ளாா் அவா்.