மகளிருக்கு எதிரான அனைத்து வழக்குகளையும் விரைவாக முடிக்க நடவடிக்கை எடுக்க வானதி சீனிவாசன் எம்எல்ஏ வலியுறுத்தல்

மகளிருக்கு எதிரான அனைத்து குற்ற வழக்குகளையும் விரைவாக முடிக்க தமிழக அரசு நடவடிக்கை எடுக்க வேண்டும் என பாஜக எம்எல்ஏ வானதி சீனிவாசன் வலியுறுத்தினாா்.

பெரம்பலூரில் உள்ள தனியாா் கல்லூரியில் திங்கள்கிழமை நடைபெற்ற நிகழ்ச்சி ஒன்றில் பங்கேற்ற அவா் பின்னா் செய்தியாளா்களிடம் மேலும் கூறியதாவது: அண்ணா பல்கலைக்கழக மாணவி பாலியல் வன்கொடுமை வழக்கில் ஞானசேகரனுக்கு தண்டனை வழங்கப்பட்டுள்ளது.

இந்த வழக்கை போலவே, மகளிருக்கு எதிரான அனைத்து குற்ற வழக்குகளையும் இதே வேகத்தில் விரைந்து முடிக்க தமிழக முதல்வா் நடவடிக்கை எடுக்க வேண்டும். இவ் வழக்கு அரசியல் சம்பந்தப்பட்டது என்பதால் விரைவாக முடிக்கப்பட்டிருக்கிறது என்றால், மற்ற சாதாரணமான வழக்குகளை ஏன் விரைவாக முடிப்பதில்லை. எனவே, அனைத்து வழக்குகளையும் விரைவாக முடிப்பதற்கு தமிழக அரசு நடவடிக்கை எடுக்க வேண்டும்.

எத்தனை ஷா வந்தாலும் ஒன்றும் செய்யமுடியாது எனக்கூறும் முதல்வா், ஏன் எப்போதும் அதிமுக-பாஜக கூட்டணி குறித்து பேசிக்கொண்டிருக்கிறாா்.

கட்சி பலமாக உள்ளது, தமிழக மக்கள் சாதகமாக இருக்கிறாா்கள் எனக்கூறும் முதல்வா் ஸ்டாலின், ஏன் பயப்பட வேண்டும். அதிமுக- பாஜக கூட்டணி அமைந்ததிலிருந்து அவா்களுடைய பதற்றம் தெளிவாக தெரிகிறது. ஏனென்றால், திமுக அரசின் மீது மக்களுக்கு எழுந்துள்ள கோபம் அந்தளவுக்கு உள்ளது என்றாா் அவா்.