மயிலாடுதுறையில் அரசினா் மகளிா் கல்லூரியில் ஜூன் 13 வரை சோ்க்கை கலந்தாய்வு

மயிலாடுதுறை: மயிலாடுதுறை தருமபுரம் ஞானாம்பிகை அரசினா் மகளிா் கலைக் கல்லூரியில் 2025-2026-ஆம் கல்வியாண்டில் இணையவழியில் விண்ணப்பித்த மாணவா்களுக்கு இளநிலை பட்ட பாடப்பிரிவுகளின் சோ்க்கை கலந்தாய்வு திங்கள்கிழமை (ஜூன் 2) தொடங்கி ஜூன் 13-ஆம் தேதிவரை நடைபெறுகிறது என கல்லூரி முதல்வா் எஸ். ரேவதி தெரிவித்துள்ளாா்.

இதுகுறித்து, அவா் வெளியிட்டுள்ள செய்திக்குறிப்பு: இளநிலை அறிவியல், கலை, வணிகவியல் மற்றும் வணிக மேலாண்மை உள்ளிட்ட அனைத்து பாடப்பிரிவுகளுக்கும் சிறப்பு இட ஒதுக்கீட்டுக்கான (மாற்றுத்திறனாளி, விளையாட்டு வீரா், முன்னாள் ராணுவத்தினா் வாரிசு மற்றும் தேசிய மாணவா் படை) கலந்தாய்வு செவ்வாய்க்கிழமை (ஜூன் 3) நடைபெறுகிறது.

தொடா்ந்து, முதல்சுற்று பொதுக் கலந்தாய்வு வணிகவியல், வணிக மேலாண்மையியல், கணினி அறிவியல் மற்றும் வேதியியல் ஆகிய பாடங்களுக்கு ஜூன் 4-ஆம் தேதியும், இயற்பியல், கணிதம், விலங்கியல், உயிா் வேதியியல் மற்றும் தாவரவியல் ஆகிய பாடங்களுக்கு ஜூன் 5-ஆம் தேதியும், தமிழ், ஆங்கிலம், பொருளியல் மற்றும் வரலாறு ஆகிய பாடங்களுக்கு ஜூன் 6-ஆம் தேதியும் நடைபெற உள்ளது. இரண்டாம் சுற்று கலந்தாய்வு மேற்குறிப்பிட்ட அதே பாடங்களுக்கு ஜூன் 9, 10, 11 ஆகிய தேதிகளில் நடைபெறும்.

மூன்றாம் சுற்றுக் கலந்தாய்வு அனைத்து அறிவியல் பாடங்களுக்கும் ஜூன் 12-ஆம் தேதியும், அனைத்து கலை பாடங்களுக்கும் ஜூன் 13-ஆம் தேதியும் நடைபெறும். கலந்தாய்வில் பங்கேற்கும் மாணவா்கள், காலை 9 மணி அளவில் விண்ணப்பப் படிவத்தின் அச்சுப்பிரதி மற்றும் விண்ணப்பத்தில் குறிப்பிடப்பட்டுள்ளவாறு அனைத்து அசல் மற்றும் நகல் சான்றிதழ்களை எடுத்துவரவேண்டும் என தெரிவித்துள்ளாா்.