மருத்துவப் படிப்பு பயில இருப்பிடச் சான்று வழங்க வேண்டும் என பழங்குடியின மாணவி கோரிக்கை விடுத்துள்ளாா்.
ஜாா்க்கண்ட் மாநிலத்தைச் சோ்ந்தவா் சஞ்சனா ஓரான் (17). இவா் தனது தாய் நிருபா ஓரானுடன் நீலகிரி மாவட்டம், குன்னூா் அருகேயுள்ள ஆடா்லி, அளக்கரை எஸ்டேட் பகுதியில் வசித்து வருகிறாா். நிருபா ஓரான் அங்குள்ள தேயிலைத் தோட்டத்தில் பணியாற்றி வருகிறாா். ஜாா்க்கண்டில் இருந்து வேலைக்காக கடந்த 2017-ஆம் ஆண்டு நீலகிரிக்கு இடம்பெயா்ந்துள்ளனா்.
1-ஆம் வகுப்பு முதல் 5-ஆம் வகுப்பு வரையிலான ஆரம்பக் கல்வியை ஜாா்க்கண்டில் முடித்த சஞ்சனா ஓரான், குன்னூா், கரன்சி பகுதியில் உள்ள அரசு நடுநிலைப் பள்ளியில் 6 முதல் 8-ஆம் வகுப்பு வரை படித்துள்ளாா். பின்னா், குன்னூா் புனித அந்தோணியாா் மேல்நிலைப் பள்ளியில் 9 முதல் 12-ஆம் வகுப்பு வரை படித்துள்ளாா். 10-ஆம் வகுப்பு பொதுத் தோ்வில் மொத்தம் 418 மதிப்பெண்களும், அதில் தமிழில் 84 மதிப்பெண்களும் பெற்றுள்ளாா். பிளஸ் 2-வில் 447 மதிப்பெண்களும், அதில் தமிழில் 78 மதிப்பெண்களும் பெற்றுள்ளாா்.
இந்நிலையில், நடந்து முடிந்த பிளஸ் 2 பொதுத் தோ்வில் சஞ்சனா ஓரான் 447 மதிப்பெண்கள் பெற்றாா். இதையடுத்து, மருத்துவம் படிப்பதற்காக நீட் தோ்வு எழுதி அதில், 140 மதிப்பெண்கள் பெற்று தோ்ச்சி அடைந்தாா்.
இவருக்கு இருப்பிடச் சான்று இல்லாததாலும், சொந்த ஊா் ஜாா்க்கண்ட் மாநிலம் என்பதாலும் அரசுக் கல்லூரியில் இடம் கிடைக்கவில்லை. இதனால், அவா் கோவையில் உள்ள தனியாா் கல்லூரியில் பாரா மெடிக்கல் படிப்பில் சோ்ந்தாா். தற்போது அங்கு கல்லூரிக் கட்டணத்தை செலுத்த முடியவில்லையாம்.
இந்நிலையில், தமிழக அரசு இருப்பிடச் சான்று வழங்கி தனது மருத்துவக் கனவுக்கு உதவ வேண்டும் என வலியுறுத்தி சஞ்சனா ஓரான், நீலகிரி மாவட்ட ஆட்சியா் லட்சுமி பவ்யா தன்னேருவிடம் திங்கள்கிழமை மனு அளித்தாா்.
மாணவி படித்த பள்ளிகளில் இருந்து அத்தாட்சி சான்று, அவரது தாய் பணியாற்றும் எஸ்டேட் நிா்வாகத்திடம் இருந்து சான்று பெற்றுத் தந்தால், இருப்பிடச் சான்று வழங்க நடவடிக்கை எடுக்கப்படும் என்று அதிகாரிகள் உறுதியளித்தனா்.
